Búgin Demokratıalyq kúshterdiń «Qazaqstan-2050» jalpyulttyq koalısıasynyń otyrysy ótti. Onda elimizdegi jetekshi saıası partıalar men qoǵamdyq birlestikterdiń ókilderi Qazaqstannyń jańa Konstıtýsıasyna qatysty birlesken málimdeme jasady. Koalısıa músheleri Prezıdenttiń Ata Zańǵa qol qoıýyn tarıhı jaǵdaı dep baǵalap, qujattyń ózin jańa saıası qurylymnyń irgetasy retinde qabyldady.

Shara barysynda kúshti prezıdenttik bıliktiń saqtalýy men jańartylǵan Konstıtýsıada táýelsiz Qazaqstannyń negizin qalaýshy – Nursultan Ábishuly Nazarbaevtyń erekshe róli odan ári nyǵaıa túskeni aıryqsha atalyp ótildi. Memleket basshysy bar bolǵany shırek ǵasyrdyń ishinde elimizdi álemdik deńgeıdegi óte qýatty jáne bedeldi memleketke, sondaı-aq, turaqtylyqtyń, birliktiń jáne qarqyndy ekonomıkalyq damýdyń ortalyǵyna aınaldyryp, qazaqstandyq jarqyn jetistiktiń asa kórnekti sáýletshisi atandy.

Demokratıalyq kúshterdiń jalpyulttyq koalısıasy konstıtýsıalyq reformanyń basty maqsaty qazaqstandyq jetistiktiń negizgi tetigi retinde qoǵamdy uıystyrý ekenin aıtty. «Nur Otan» partıasy Tóraǵasy Birinshi orynbasarynyń aıtýynsha, Elbasymyzdyń Úshinshi jańǵyrý men «Qazaqstan-2050» damý strategıasy aıasynda aldymyzǵa qoıǵan mindetteriniń aýqymdylyǵy men asa kúrdeliligi eskerilip, jańa kezeńde de birlik, birtutastyq jáne turaqtylyq sıaqty negizgi qundylyqtardyń mańyzy arta bermek. Sondyqtan jańadan qabyldanǵan Ata Zańdy búkilhalyqtyq kelisimniń Konstıtýsıasy dep ataýǵa tolyq negiz bar. «Bizdiń búgingi basqosýymyzdyń da Beıbitshilik jáne kelisim saraıynda ótýi tegin emes», – dedi Muhtar Qul-Muhammed.

Jıyndy qorytyndylaı kele, «Nur Otan» partıasy Tóraǵasynyń Birinshi orynbasary: «Prezıdentimiz elimizdiń saıası arenasynda osyndaı aýqymdy reforma júrgizý arqyly bizge úlken úmit artyp otyr. Endi biz Elbasy men barsha Qazaqstan halqynyń zor senimin abyroımen aqtaýǵa tıispiz», – dedi.