Ózbekstannyń birinshi prezıdenti Islam Karımovtiń qazasynan keıin kóńil aıta barǵan Qazaqstan prezıdenti Nazarbaev pen sol kezdegi ýaqytsha prezıdent Mırzıóev. 13 qyrkúıek 2016 jyl.

Ózbekstan prezıdenti Shavkat Mırzıóev Qazaqstanǵa 22-23 naýryzda keledi. Bul týraly Májiliste úkimet saǵatynda syrtqy ister mınıstri Qaırat Ábdirahmanov málimdedi, dep habarlaıdy Qamshy.kz. Onyń sózinshe, Mırzıaevtiń saparynan soń Astanaǵa Ortalyq Azıa elderiniń "birneshe basshylary" saparlap keledi.

Ótken jyldyń jeltoqsanynda saılanǵan Ózbekstannyń ekinshi prezıdenti Mırzıóevtiń alǵashqy sapary Reseıge jasalatyny týraly kóp aıtylǵan. Keıin birqatar BAQ Mırzıaev memleket basshysy retindegi shetelge alǵashqy saparyn jyldyń birinshi jartysynda Astanadan bastaıdy dep habarlaǵan. Biraq Mırzıaev 6-7 naýryzda Túrkimenstanǵa barǵan. Sapar qorytyndysynda Túrkimenstan prezıdenti Gýrbangýly Berdimuhamedovpen birlesken málimdeme qabyldanǵan.

Úkimet saǵatynda sóılegen Abdrahmanov Ózbekstan basshysynyń sapary aımaq elderiniń "transulttyq sıpattaǵy máseleler aldynda" birligi jaqsy ekenin kezekti ret aıǵaqtaıtynyn aıtty.

Aıta ketetin bolsaq, Ózbekstanǵa Mırzıóev prezıdent bolyp kelgennen keıin Ózbek eli kórshilermen ashyq qatynas ustana bastady. Tipti ol Prezıdent bolyp saılanǵanǵa deıin-aq, ýaqytsha prezıdent kezinde Qyrǵyzstanmen arada shekara daýynyń biraz bóligin sheship tastady. Qazaqstan da ózbektiń jańa bıligi men tranzıttik, shekaralyq birneshe mańyzdy kelisimder jasap úlgerdi.