Terorrızm men ekstremızmniń aldyn alýǵa, ulttyq bolmysymyzǵa qaıshy rýhanı dertterdiń bet-perdesin ashýǵa baǵyttalǵan, dástúrli dinimizdi, qazaqy salt-sanamyzdy dáripteıtin jańa kórkem fılm kórermenge jol tartty.
Búlingen taǵdyr, shaıqalǵan shańyraq. Fılm jelisi jat aǵymnyń jeteginde ketip, qoǵamǵa sıyspaı, oqshaýlanǵan jas jigit jaıynda órbimek. «Asyl arna» telearnasynyń tól ónimi tolyq metrajdy «Sergeldeń» fılminiń tusaýkeseri 13 naýryz kúni ótti. Basty rólderdi somdaıtyn - Almat Saqatov jáne Maqsat Sábıtov.
«Asyl arnanyń» Bas dırektory, Qazaqstannyń eńbek sińirgen qaıratkeri, aqyn Muhamedjan Tazabek óziniń ınstagram paraqshasynda pikirin bylaı jetkizdi: «Oınaǵysy keletin bala kóp, oılanǵysy keletinder az, til biletin balalardy tárbıelep jatyrmyz, til alatyn balany kim tárbıeleıdi? Jastardyń jat aǵymǵa ilesip, adasýǵa urynýynyń negizgi sebebi - alǵashqy týyndaǵan dinı, rýhanı suraǵynda durys jaýap tappaýynda. Iaǵnı, úlkenderge túser salmaq kóp. Úlgimiz úzilip ketkeli qashan?! Babalar shıratyp ustaǵan jipti jalǵaı alamyz ba? «Sergeldeń» fılmi soǵan jaýap izdeıdi. Aqıqı din, ata dástúr, ana sútimen daryǵan qasıetter... Eldigimiz ólmesin, tektiligimiz túgesilmesin!»
Qazaq halqynyń maqtanyshy - Dýlat Isabekov Asyl arna túsirgen «Sergeldeń» fılmine jyly pikir bildirip, zor tabys tiledi.
Abai.kz portalynyń bas redaktory, pýblısıs, jazýshy Dáýren Qýat pen ultjandy azamat Ǵabıden Jákeı, profesor Aıgúl İsmaqova, jazýshy Ermahan Shaıhy, baspager Jarylqasyn Dáýlet syndy el azamattary kórermenge jol tartqan «Sergeldeń" fılmin tamashalap, óz oılarymen bólisti.
Sondaı-aq, ǵalym, qoǵam qaıratkeri, fılologıa ǵylymynyń doktory, profesor. Qazaqstannyń eńbek sińirgen qaıratkeri, «Parasat ordeniniń» jáne «Til janashyry» qurmet belgisiniń ıegeri Asyly Osmanova da Asyl arna ujymyna tilekshi bolyp, fılmdi tamashalap qaıtty.
Aqaprat Muhamedjan Tazabektiń ınstagram paraqshasynan alynǵan
