Kóbine adamdar 12 múshesi saý, túr-álpeti, dene bitimi minsiz bola tura ómirine nalyp júredi. Ne jetispeıtini belgisiz, áıteý óz-ózderin baǵalaýdan qalady. Alaıda, ómirde kelbeti usqynsyz nemese múgedektikke shaldyqqan qanshama qyz-jigitter bar. Basqalarynyń janynda olar ómirge nalýǵa quqyly. Biraq, olaı istemeıdi. Kerisinshe, jigerlenedi, ómirge degen qulshynysy erekshe bolady, boılaryna bárin jeńýge daıyn batyldyq darıdy. Sondaı, keıipkerdiń biri amerıkalyq Eshlı Soto.

 Vıtılıgo aýrýymen aýratyn qyzǵa eldiń bári mazaqtap qaraıtyn. Alaıda, qyz aýrýyn jeńip shyqty. Joq, aýrýynan aıyǵyp ketti degen sóz emes, óz aýrýyn óner týyndysyna aınaldyrdy.

12 jasynda amerıkalyq Eshlı Soto álem boıynsha adamdardyń 1%-y ǵana aýratyn vıtılıgo aýrýyna shaldyǵady. Kishkentaı kezinde moınyna aq daqtardyń túsýinen bastap, ýaqyt óte kele denesiniń 75%-yn jaılady. Árıne, bundaı aýrýmen qyz balaǵa kúresý qıyn tıetini anyq. Árdaıym dostarynyń mazaǵyna qalatyn, onymen eshkim aralasqysy kelmegen. Sol úshin qyz denesin túgeldeı jaýyp turatyn uzyn kóılekter kıip júretin.

Alaıda, ómir boıy bulaı jasyrynýdan denesindegi daqtar ketip qalmaıdy ǵoı. Qyz bárine kónýge bel baılaıdy. 21 jasynda Eshlı óz beınesin jaqsy kóre bastaıdy. Óz-ózin qalaı bar solaı qabyldaıdy. Jurttan jasyrynýyn doǵarady. Sóıtip denesindegi daqqa aınalǵan bólikterin túrli túske boıap, aýrýyn óner týyndysyna aınaldyrady. Búgingi kúni Eshlıdiń denesinen álemniń kartasyn kóre alamyz.

Qazir bul arý ınstagramda 84 myń oqyrmany bar tanymal bloger. Óziniń denesine túrli sýretter salyp jurtty tań qaldyryp júr. Onyń qıalynyń shegi joq ispetti.

«Men óz denemniń sulýlyǵyn qara markermen sýret salǵan kezde kórdim. Oǵan deıin ózimdi ádemi dep eseptemeıtinmin» -deıdi Eshlı. Onyń aıtýynsha, ózin sol keıpinde jaqsy kórýge yqpal etken bodı-art óneri eken.

Adam ómirge synalý úshin keledi. Al, syn mindetti túrde qıyndyǵyn ala keledi. Alaıda, adamdardyń synalǵany emes, sol syndy qalaı ótkergeni mańyzdy.