Basymnan ótken osy bir oqıǵa bir adamǵa bolsyn paıdasyn tıgizse, oı salsa degen oımen jazyp otyrmyn.
Áleýmettik jeli bar adamnyń sanasyn bılep bara jatqan sekildi. Búgingi tańda bárimizge tanymal «vatsap» jelisi kóp adamǵa zıanymen qosa paıdasyn da tıgizip jatqany jasyryn emes. Siz bul jelini madaqtaýǵa kiristi dep oılap qalmańyz, men osy jelimen baılanysty bir oqıǵany baıandap bergim kelip otyr.
Ne eken dep jaı qaraı salýmen hatty ashqan men taraýıh namazy jaıly jazylǵan qaripterdi kórip hatty sońyna deıin oqyp shyǵýǵa bel baıladym. Óte jaqsy jazylypty. Daýystap oqı bastadym... «Taraýıh namazyn oqyǵannyń qanshalyqty saýaby bar ekenin bile bermeıtinimiz ras. Sondyqtan da bul jaıynda paıǵambarymyz Muhammed (s.ǵ.s.) bylaı dep aıtqan:
Orazanyń birinshi keshinde taraýıh namazyn oqyǵan momyn anasynan jańa týylǵandaı kúnádan tazarady.
Ekinshi keshinde eger ata-anasy musylman bolsa, olardyń kúnálary keshiriledi.
Úshinshi keshte bir perishte: «Ia, Alla, qabyl etkin amalyn», dep jarıa etip aıtady. Iaǵnı «Alla Taǵala jasaǵan kúnálaryn keshti» dep aıtady» deı berginimde joldasym sózimdi bólip, ekinshisin qaıta oqýymdy ótindi. Men irkilmesten qaıta oqyp berdim. Ol únsiz biraz otyrdy da, daýysyn diril alyp «men keshe barmadym ǵoı taraýıhqa» dedi. Men jumysta boldyń ǵoı eshteńe etpes dep, ary qaraı jalǵastyra kettim. Joldasym únsiz ǵana sońyna deıin tyńdap shyqty da «Allaǵa sansyz madaq» dep turyp ketti. Daýysyndaǵy diril órshı túskendeı. Keıinnen oıyn jınap aldy ma álde meniń bile júrgenimdi durys sanady ma ishin kernegen ókinishin aıtyp kózine jas aldy. Joldasymnyń ákesi ishimdikke salynǵan. Búginde araqtan boıyn alastatý maqsatynda aǵa-baýyrdyń istegen amaldarynan esh nátıje bolmaı tur. «Eger taraýıhqa bara alǵanymda ákemniń kúni búginge deıin jasaǵan kúnálary keshiriletin eken. Anamnyń abaısyzda aıtqan aýyr sózderi, ákeme bildirgen renishteri, kúpirlikteri bári de keshiriletin eken. Ákemniń anama qol jumsap, balalaryn ıtshe sabaǵany da, bir bótelke úshin aǵaıynmen ara-jik bolyp, arazdasqany da bári de keshiriletin eken. Qanshalyqty aýyr kúná bolsa da keshiriletin eken. Men nege kesh bildim? Nege kesh?» dep arqa súıer azamatym eńkildeı bergeninde mende eriksiz kózime jas aldym. Biraq baıqatpaýǵa tyrysyp, sabyrǵa shaqyrdym. Kelesi jyly Alla buıyrtsa taǵy da oraza ustap, taraýıhqa birge baramyz dedim. Aýzyma túsken bar sóz osy boldy.
Ramazan aıynyń bir jetisi de ótip ketti. Ýaqyt jyldam ekenin osyndaı kezde uǵady ekensiń. Joldasym qazir kúndelikti taraýıh namazynan qalmaıdy. Alladan raqym tilep, ata-anasy úshin keshirim suraıdy. Taraýıh namazynyń saýaby mol ekenin men osy oqıǵadan keıin uqtym. Quran aıattaryna tili kelmeıtin, tek namaz oqyp jatqan namazhandardyń istegenin qaıtalap turatyn joldasyma Allanyń nury jaýyp, óz betinshi sájdege bas qoıar degen úmit meni alǵa jeteleıdi.
BAQ betterinde kóbine jaman jaqtary ǵana aıtylyp keletin keıbir áleýmettik jelilerdiń tıgizer paıdasy da bar eken. Joǵaryda kelgen aqparattyń qanshalyqty shyndyqqa janasatynyn bilmeımin. Bir anyǵy, sol málimet bir júrekti jylytty. Ata-anaǵa degen meıirimdi arttyrdy, bolashaqqa úmit arttyrdy.
Taraýıh namazyn oqý barsha musylmanǵa násip etkeı.
Balqash qalalyq meshiti
Káýsar SABYR
