27 naýryzda Astanada «Habar» agenttiginiń quramyndaǵy jańa «El Arna» telearnasynyń tusaýy kesildi. Onyń efırinen tek otandyq derekti fılmder, shyǵarmashylyq lentalar men serıaldar kórsetiletin bolady.

Tusaýkeserge qatysqan memleket jáne qoǵam qaıratkeri Myrzataı Joldasbekov jańa arnaǵa úlken úmit artylyp otyrǵanyn aıtty. Bul týraly sputniknews.kz habarlaıdy.

«Jasyratyny joq, keıingi kezde Qazaqstannyń telearnalarynda ylǵı bir baıansyz mahabbat, turlaýsyz ómir keshken, jylarman, qaıǵyly túriktiń fılmderin kórsetýmen  jalyqtyrdy. Bitpeıtin bir sondaı fılmderge tap boldyq.  Halqymyz, ásirese, aýyldaǵy halyq sýsap otyr. Qalada áıteýir kınoteatrlar bar, al aýylda olar joq.  Endi  asyldarymyz jaıly fılmderdi kóretin bolamyz. Halyqtyń kókeıindegisin taba bilseńder, jaman bolmaıdy. Nesin jasyramyz, qazaqqa qyzmet etetin ýaqyt boldy ǵoı. Ózgeniń mańdaıynan sıpap, ózgeni jetektep, ózin jarqylqamaı qalǵan halyqpyz. Qazaqty qazaqtan basqa eshkim jarylqamaıdy. Sondyqtan qazaqtyń mańdaıynan sıpap, arqasynan qaǵatyn ýaqyt keldi», — dedi qoǵam qaıratkeri. 

Myrzataı Joldasbekov tutas fılmge arqaý bolatyn qazaqta birtýar tulǵalar kóp ekenin atap ótti. 

«Bizdiń tarıhymyzda nebir tulǵalar bar. Danalarymyz týraly fılmder túsirilse deımin. Kúltegin batyr, ber jaǵynda Buqar jyraý, keshegi halyqty otyrǵyzyp, turǵyzǵan úsh bı týraly túsirýge bolady. Búgin Shámshi týraly fılmdi kóredi ekenbiz. Muqaǵalı týraly da fılm túsirilse jaqsy bolady», — dedi ol. 

 Jańa telearna ár túrli jyldardyń kınotaspalaryn usynatyn bolady:

«Qazaqfılm» klasıkasynan bastap zamanaýı kınotýyndylarǵa deıin, sonymen birge muraǵattyq jáne kópshilikke asa málim bola qoımaǵan fılmder. Budan bólek, arnanyń efırin otandyq rejıserlerdiń telehıkaıalary da tolyqtyrady. 

 «Aqparat aıdynyna jol tartqan otandyq jańa arna «El arnanyń» qadamy qutty bolsyn. Búgingi kúni televızıa qoǵamdyq sanany qalyptastyrýǵa yqpaly zor, qýatty qural ekeni belgili. Osy quraldy ult múddesine, urpaq tárbıesine utymdy paıdalana bilý Memleket basshysy alǵa qoıǵan basty mindetteriniń biri. Kórermen qaýymǵa tek qana ózimizdiń otandyq kórkem jáne otandyq derekti fılmderdi usynatyn, halyqtyq arna osy maqsatta ashylyp otyr. Altyn qorymyzdy urpaq ıgiligine jaratýdy kózdegen jańa arnany biz eldiń arnasy bolsyn degen nıetpen «El arna» dep atadyq», — dedi óz kezeginde QR Aqparat jáne komýnıkasıalar mınıstri Dáýren Abaev. 

Jańa arnanyń tusaýkeseri sheńberinde aty ańyzǵa aınalǵan kompozıtor Shámshi Qaldaıaqovtyń ómiri men shyǵarmashylyǵy týraly «Án-Aǵa» tolyq metrajdy fılminiń premeralyq kórsetilimi ótti.