M.Áýezov atyndaǵy Qazaq Memlekettik akademıalyq drama teatrynyń ujymy elordada 10 maýsym men 10 qyrkúıek aralyǵynda ótetin «Astana Ekspo - 2017» Halyqaralyq mamandandyrylǵan kórmesine qatysý úshin josparly jumystaryn talqylap, qyzý daıyndyqty bastap ketti dep habarlaıdy qamshy.kz Tetardyń baspasóz qyzmetine silteme jasap.
Elimizde ótetin Dúnıejúzilik kórmeniń aıasynda atalmysh teatr, Astana opera jáne balet, Astana Jastar teatrynyń sahnasynda 18-26 maýsym aralyǵynda óz qoıylymdaryn "Ekspo-2017" qonaqtaryna usynatyn bolady. Atap aıtsaq, Ǵ.Músirepovtyń «Mahabbat dastany» tragedıasy (rej.Q.Súgirbekov), «Qyz Jibek» múzıkli (rej. E.Nursultan), M.Áýezovtyń «Abaı» tragedıasy (rej. E.Obaev), R.Otarbaevtyń «Sultan Beıbarys» tarıhı dramasy (rej. Iý.Hanıngo-Beknazar), M.Omarovanyń «Kómbe nannyń dámi» dramasy (rej. A.Kákisheva), Ǵ.Esimniń «Tańsulý» dramasy (rej. A.Kákisheva), Iran-Ǵaıyptyń «Qorqyttyń kóri» ańyz-dastany (rej. I.Vaıtkýs) kórermenge jol tartpaq. Qoıylymdarǵa qysqasha toqtalyp ótsek.
Ǵabıt Músirepovtiń «Mahabbat dastany» tragedıasynda jastardyń súıip qosylýdy arman etken tilek-múddeleri qamtylady.
Raqymjan Otarbaevtyń "Sultan Beıbarys" tarıhı dramasynda ıleýshiniń túr-tulǵasy sahnada sóıleıdi. Deshti qypshaq ulany, on jasynda jetim qalyp, quldyqqa ózge elge satylyp ketken Sultan az-Zahır Beıbarys (1223-1277) – qatardaǵy quldan Mysyr eliniń oıly da kemeńger bıleýshisi dárejesine deıin kóterilgen taǵdyry óte kúrdeli, qarama-qaıshylyqty tulǵa. Qanshalyqty bıik ataq-dańq pen asa zor bılik áleýetine ıe bolsa da Beıbarys babamyzdyń júregin máńgilik bir saǵynysh syzdatyp ótken. Týǵan el-jerine, saıyn dalasyna, jýsannyń ashqyltym ıisine degen sol saǵynysh – spektákldiń de negizgi leıtmotıvi. «Ózge elde sultan bolǵansha, óz elińde ultan bol» degendi halyq beker aıtpasa kerek…
M.Áýezovtyń "Abaı" tragedıasynda aqyn ómiriniń bir kezeńi sýretteledi. Uly Abaı… Shyǵarmashylyq tulǵasy óz aldyna, el ortasyndaǵy, óz shákirtteri ortasyndaǵy jaqsyny kóre-tanı bilgen, ǵashyqtyqty baǵalaı, ár shákirtine naǵyz ustaz bola bilgen adamı tynys-tirshiligi, sonymen qatar zulymdyqpen alysqan soqtyqpaly, soqpaqty ómiri. Jańa zamannyń, órkenıettiń bastaýy bolǵan, qoǵamdyq sananyń ilgerileýine qyzmet etken Abaı bolmysy. Qoıylymda uly aqyn shyǵarmashylyǵynyń kompozıtorlyq qyry da ashyla túsedi.
M.Omarovanyń "Kómbe nannyń dámi" dramasy túrli tarıhı jaǵdaıda Qazaqstanǵa jer aýdarylǵan ulttardyń taǵdyryn arqaý etken. Sol surqaı zamandaǵy adam taǵdyryn kórsete otyryp, dosqa qushaǵy ashyq, meıirimi men qaıyrymy mol qazaq halqynyń mártebesin kóteredi. Tarıhty negiz etken qoıylymnyń aıtar oıy – keshegi qıyn kúnder arqyly búgingi tynyshtyq pen berekeniń narqyn bilýge, baǵalaýǵa shaqyrady.
Ǵ.Esimniń "Tańsulý" dramasynda qazaq qyzynyń batyldyǵy men rýhynyń bıiktigi áspetteledi. «El bolam deseń besigińdi túze». Qyz ósirýge erekshe mán bergen qazaq úshin osy uǵym – qaǵıda. Tolyqsyp boıjetip, óz teńine uzatylǵaly otyrǵan, atyna zaty saı Tańsulýdyń taǵdyry ǵasyrlar boıǵy qazaq qyzdarynyń enshisi. Tutqynǵa túsken arý, kóz qurty bolǵan sulýlyǵyn óz erkimen tárk etedi. Urpaǵyn aman saqtap, mahabbatyna da qylań túsirmeıdi. Qansha qıyn kún týsa da moıymaı, ulyna babalar rýhyn jyrlaıdy. …Óziniń mundaı talaıly taǵdyryn on jasynda túsinde kórgen Tańsulý – Uly Dalanyń jazylmaǵan zańy – tektilik pen namystyń sımvoly dese bolady.
Ǵ.Músirepovtiń "Qyz Jibek" eposyn mahabbat gımni deýdiń ábden jóni bar. Onyń naǵyz kórkem týyndyǵa aınalý prosesi júrip jatqan kezde, ıaǵnı HVİ-HVİİİ ǵasyrlardaǵy qazaq qoǵamynda jeke bastyń, sezimniń bostandyǵy, mahabbat erkindigi týraly másele mundaı deńgeıde ashyq aıtyla bermegen, eski rýlyq zamannyń neke men otbasyna qatysty ejeqabyl, qalyńmal, kóp áıel alý, ámeńgerlik sıaqty salttary ústem bolǵan. Solaı bola tursa da, "Qyz Jibek" jyrynyń shyǵýy sol dáýirdiń ózinde-aq halyqtyń ıdeal týraly estetıkalyq paıym-túsiniginde belgili bir dárejede ózgeris bolǵanyn aıǵaqtaıdy. Tólegenniń de, Jibektiń de ózine laıyq jar izdeýi, súıispenshilikpen úılenýdi kózdeýi - sol kezeńdegi jastardyń oıynda, kókireginde júrgen armanyn, muńyn, tilegin ańǵartady. Jyrdyń el arasynda keń taraǵanynyń bir sebebi osynda bolsa kerek.
Iran-Ǵaıyptyń "Qorqyttyń kóri" ańyz-dastanynda mahabbat ta, otbasy da, dinı-nanym senim de bar.
…«Qorqyttyń Kóri» – Qorqyt-Babamyzdyń zapyrandaı ashshy ańyz-ómirine arnap qoıylǵan Sahnalyq Túısiktiń Beıne-Tujyrymy.
«Qorqyttyń Kóri» – Órkenıettiń, Mádenıettiń, Ónerdiń, Kúıdiń – Qasıetti de Kıeli Rýhanı Uǵymnyń – Janaza-Rekvıemi.
«Qorqyttyń Kóri» – Dúnıe-Kezek – Dinder astasýy…
Qoıylym oqıǵasy – Rasýl (Muhamed) Paıǵambar zamanyna jaqyn tusta (VII-VIII ǵasyrda) Baıat (Syrdarıa ózeni)boıynda ótedi.
Qorqyt – Búkil Shyǵys Órkenıeti irgetasyn qalaýshylardyń ishindegi eń aıtýly Tulǵa.
Atalǵan spektáklder teatr repertýarynan berik oryn alǵan, halyqtyń zor qoshemetine bólengen kórkemdik tutastyqta sheshilgen shyǵarmalar.
