Júregi tunǵan meıirim, alaqandary aıaly, Qazaqtyń árbir arýy tamyryn tereń jaıady. Taqpasa daǵy úkisin, úlpildep turǵan úmitim, Burymyn sál-pál qısa da, kóńili, jany baıaǵy.
Jandaryn eger zertteseń, túbine jetpes ilimdeı, «Aýyzǵa úrip salǵandaı», qazaqtyń qyzy úrimdeı. Kelbetti, kórkem boıjetken — buralyp ósken tal shybyq, Qazaqtyń árbir sulýy dalamnyń bir-bir gúlindeı.
Qyzy bar úıdiń tórine baqyttyń qusy qonady, Bereke kirip, shańyraq yrys pen qutqa tolady. Súıetin bolsań olardy — Qyz Jibek, Eńlik, Baıandaı, Jaýyna eger kektense, Álıa men Mánshúk bolady!
Qazaqtyń qyzy qyrmyzy, kún daǵy oǵan kúlip tur, Jaratqan Alla olarǵa yrzyq pen násip buryp tur. Amanattary babamnyń — arýdyń nurly júzinde, Halqymnyń arman, úmiti qarashyǵynda tunyp tur.
Qyzbenen birge ár úıge ádep pen ıba taralǵan, Qazaqtyń árbir arýy álemnen mynaý nár alǵan. Dúnıeniń barlyq sulýy qurmet pen syıǵa laıyqty, Qazaqtyń qyzy aıalap, ardaqtaý úshin jaralǵan!
