Qazaqstanda kezekti kókek ana ustaldy. Jigiti úılenýden bas tartqan áıel týǵan sábıin 60 myń teńgege aıyrbastap jibergen.
Aqtóbelik Janna Aqalasova jańa týǵan balasyn perzenthanadan shyǵa sala aldyn-ala kelisim bergen adamǵa ustatyp jibergen. Al Dına Dosaqova uzaq jyldar boıy sábı súıe almaı júrgen uly men kelinine balany alyp bergen, dep habarlaıdy QazAqparat tilshisi.
Aqtóbedegi Iývenaldy sotta balasyn bógde adamǵa berip jibergen Janna Aqalasovaǵa qatysty sot otyrysy bastaldy. Ol Qylmystyq kodekstiń «Kámeletke tolmaǵandar saýdasy» baby boıynsha aıyptalyp jatyr. İs materıaldaryna súıensek, 32 jastaǵy Janna Aqalasova buryn turmys qurmaǵan. Eki balasy bar. Birinshisin 2009 jyly dúnıege ákelgen. Ony sábıler úıine tapsyrǵan. Al ekinshi ulyn 2017 jyldyń qańtar aıynda bosandy.
«Aıyptaý qorytyndysymen tanystym, biraq jartylaı moıyndaımyn. Men balany satý týraly oılaǵan emespin. Aslan esimdi jigitpen kezdesip júrip, júkti bolyp qaldym. Ózim qoǵamdyq kólikti kondýktor bolyp jumys isteımin, páter jaldap turamyn. Úılenýden bas tartqan soń júkti ekenimdi páter ıesine aıtpadym. Olar meniń jaǵdaıymdy perzenthanaǵa ketip bara jatqanda bildi. Sol kezde jeke kýáligim kepilde jatty. Sony alý úshin, erteńgi kúnimdi oılap, tanysym Danagúl Óteshovaǵa habar berdim. Bala jetimder úıine túspesin, tolyq otbasyna er jetip, baqytty bolsyn degen nıetpen basqa adamdarǵa bergim keldi. Kelisip, notarıýs arqyly «bas tartamyn» dep qolhat jazdym. Keıin olar maǵan kómek retinde 60 myń teńge berdi. Aqshany Danagúl Óteshova ekeýmiz bólip aldyq», - dedi aıyptalýshy Janna Aqalasova. Aıyptalýshy qazir páter jaldap jatqan úıine qaıta oralyp, jaǵdaıdy baıandaǵan soń páter ıesi qatelik jasaǵanyn, balany qaıta alýy kerek ekenin aıtady. Sol kezde Aqalasova jerlesi ári eski tanysy Óteshovaǵa habarlasyp, «balamdy qaıtaryp alamyn» degen ótinishin aıtqan. Kelisim bolmaǵan soń Aqalasova polısıaǵa shaǵymdandy.
Al aıyptaý qorytyndysyn oqyǵan prokýror Nurlan Sándibaı aıyptalýshy J.Aqalasova, D.Óteshova, D.Dosaqovanyń aldyn-ala ózara keliskenin aıtyp otyr. «Janna Aqalasova 2017 jyldyń 16 qańtary kúni bosandy. Perzenthanada jatqan kezde ol Dına Dosaqovadan hat alyp turǵan. Ol perzenthanadan 18 qańtar kúni shyǵyp, sol jerge kelip turǵan D.Dosaqovaǵa balany ustatady. Keshkilik Aqalasovaǵa baladan bas tartý týraly qolhat berip, aqshany aldy»,- dedi prokýror.
Sot otyrysyna aıyptalýshylardyń barlyǵy qatysty. Balasy men kelinin oılaǵan Dına Dosaqovanyń aıtýynsha, jas ana men olardy tanystyrǵan Danagúl Óteshovanyń arasynda aqsha týraly kelisim múlde bolmaǵanyn jetkizdi. Olar anaǵa alǵys retinde qolynda bar 60 myń teńgeni bergen.
«Meniń jasym úlken, mundaı qıyndyqqa tap bolamyn degen joqpyn. Qazaqtyń bir balasy jetim óspesin degen nıetpen, balany alyp, baýyrymyzǵa basamyz dep sheshim shyǵardyq», - dedi D.Dosaqova. Aıta keteıik, úsh aılyq sábı qazir «Úmit» sábıler úıinde. Qalalyq bilim bóliminiń bas mamany Raýan Shúkirovanyń aıtýynsha, balanyń densaýlyǵy jaqsy, dárigerler sábıden esh kinárat tappaǵan.
Aıta keteıik, bala satty degen kúdikke iligip, jasaǵan isteri úshin ókingen aıyptalýshylardyń kinási tolyq dáleldense, olardyń múlki tárkilenip, 7 jyldan 10 jylǵa deıin bas bostandyqtarynan aıyrylýy múmkin.
