Almaty oblysynda 4 kún boıy iz-tússiz joǵalǵan bala mán-jaıdy baıandap berdi. Ol qystaqqa ózi adaspaı barǵanyn aıtty, dep habarlaıdy QazAqparat

7 jastaǵy Ábilqaıyrdyń sózinshe, ol qystaqqa jetý úshin jaıaý júrip, sýdy da keshken.

«Barǵym keldi. Sol jaqqa bardym, ol jaqta aǵalar bar eken. Erlan, Andreı degen. Bireýi orys, bireýi qazaq. Sol jaqta júrdim. Mal bar eken»,- deıdi jetkinshek.

Balanyń aıtýyna qaraǵanda, ol bul aımaqta buryn bolmaǵan. Taýǵa shyǵyp, jan-jaǵyna kóz júgirtip, artynsha qystaqty kórip, sol jerge bet alǵanǵa uqsaıdy.

Qazir 4 kún boıy izdeýde bolǵan Ábilqaıyr Seıitjanulyna arnaıy sot-medısınalyq saraptama taǵaıyndalǵan jáne balany ınternatqa ótkizý jaıy da talqylanyp jatyr. Sebebi, onyń anasy janynda emes. Al ákesi jaldanyp jumys jasaıtyn kórinedi.

Buǵan deıin habarlaǵanymyzdaı, balanyń joǵalǵandyǵy jóninde habar Alakól aýdandyq İİB Qabanbaı aýylyndaǵy bólimshesine Áshim aýylynyń turǵyny habar bergen. Alakóldiń polıseılerin aıaǵynan tik turǵyzǵan balaqaı Áshim aýylynan 3 shaqyrymdaı jerde ornalasqan qystaqtan tabyldy.

4 kún boıy joǵalǵan uldy izdestirýge aýyl turǵyndary, mektepte isteıtin jumysshylar, áskerı qyzmetkerler men 200-ge jýyq eriktiler bir kisideı at salysqan.