Naýryzdyń basynda Navalnyıdyń bastaýymen Jemqorlyqqa qarsy kúres qory Reseı Premer-mınıstri Dmıtrıı Medvedevtke qatysty tergeý júrgizip, nátıjesinde Premer-mınıstrge aıypty dep taýyp, Reseıdiń birneshe qalasynda Jemqorlyqqa qarsy aksıa ótken. Bul jaıynda «Qamshy» aqparattyq agenttigi jazǵan bolatyn.

Alaıda, Reseıdiń Memlekettik dýmasy qordyń tergeý málimetterin tekserýden bas tartty. Tıisti sheshim parlamenttiń tómengi palatasynyń plenarly otyrysynda qabyldandy, dep habarlaıdy «Interfaks».

Reseı komýnıstik partıasynyń músheleri, depýtattar Nıkolaı Kolomeısev, Sergeı Reshýlskıı jáne Iýrıı Sınelshıkov premer-mınıstrge qatysty tergeýdiń málimetterin tekserýdi usynǵan edi. Alaıda Memlekettik dýma bul bastamany quptamady.

Qaýipsizdik jáne jemqorlyqqa qarsy is-qımyl komıtetiniń basshysy Vasılıı Pıskarevtiń aıtýynsha, ol «jemqorlyqpen kúres qorynan túsetin mundaı materıaldardyń talaıyn kórgen».

«Osyǵan deıin qor júrgizgen tergeýlerdiń eshqaısysy aqıqatpen sáıkes kelgen emes. Sońǵy tergeý de solaı. Al olardyń bizge únemi nasıhattap, dáriptep júretin jemqorlyqqa qarsy kúresine tipten qatysy joq», - dep atap ótti ol.

Al, 4 sáýir kúni Dmıtrıı Medvedevtiń ózi Navalnyıdyń júrgizgen tergeý jumystaryn baryp turǵan «byljyraq», «qur qaǵaz» dep pikirin bildirgen.