Elbasy tapsyrmasyna sáıkes QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan Qazaqstan delegasıasy Izraıl Memleketine jumys saparymen bardy dep habarlaıdy "Qamshy" aqparattyq agenttigi QR ASHM Baspasóz qyzmetine silteme jasap.

Delegasıa quramynda memlekettik organ, «Atameken» UKP, Ulttyq agrarlyq ǵylymı-bilim berý ortalyǵy jáne «QazaqstanInjınırıng», «Azyq-túlik kelisim shart korporasıasy» ulttyq kompanıalarynyń ókilderi bar.

Jumys saparynyń basty maqsaty – Memleket basshysy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyndaǵy AÓK-ke shetelden ınvestısıa tartý boıynsha bergen tapsyrmalaryn júzege asyrý jáne eki jaqty tıimdi kelisimderge qol jetkizý.

A.Myrzahmetov Izraıl Memleketiniń aýyl sharýashylyǵy jáne aýyldyq aýmaqtardy damytý mınıstri, Knessettegi «Evreı úıi» partıasynyń depýtaty Ýrı Arıelmen kezdesti.

Kezdesý barysynda eki el arasyndaǵy kelisimge sáıkes 2017-2018 jyldarǵa arnalǵan aýyl sharýashylyǵy salasynda yntymaqtasý boıynsha Jol kartasyna qol qoıdy.

Budan bólek, Qazaqstan aýmaǵynda komersıalyq negizdegi demonstrasıalyq fermalar qurý boıynsha Deklarasıaǵa qol qoıylyp, olardyń kesheninde aýyl sharýashylyǵynyń ár alýan baǵyttary boıynsha tehnologıalardy tanystyrý talqylanady.

Sondaı-aq, delegasıa músheleri aýyl sharýashylyǵy salasyndaǵy jańa tehnologıalarmen aınalysatyn «Volcani center» ǵylymı-zertteý ınstıtýtyna bardy. Munda birikken zertteýler men jas mamandardy daıarlaý máseleleri qaraldy.

Izraıl – balǵyn ónimderdi syrtqa shyǵaratyn iri eksporttaýshylardyń biri jáne aýyl sharýashylyǵy salasy boıynsha álemdik kóshbasshy bolyp tabylady.

Investısıa tartý jáne otandyq ónimderdi eksporttaý úshin «dóńgelek ústel» formatynda ızraıldik agrobıznes ókilderimen kezdesý ótkizý de josparda bar.
Taǵy bir aıta keterlik jaıt, tájirıbe almasý úshin delegasıa músheleri «Granot» aýyl sharýashylyǵy kooperatıvi men Sý resýrstaryn únemdeý jáne basqarý kompanıasy jumysymen tanysady.