Italıa eliniń Baloná qalasynda jurt tań qalarlyqtaı oqıǵa boldy. Anasy óziniń 14 jastaǵy qyzy hıdjab kıýden bas tartqany úshin shashyn taqyrlap alyp tastady dep habarlaıdy "Qamshy" aqparattyq agenttigi Baq.kz-ke silteme jasap. Ony baıqaǵan mektep basshylyǵy quqyq qorǵaý organdaryna habarlaǵan. 14 jasar qyzdyń jáne onyń sińlileriniń máselesimen áleýmettik qyzmetkerler aınalysýda. Osy málimetke súıensek anasy basqa qyzdaryn da hıdjab kıýge májbúrlegen bolýy ábden múmkin.

Qyzdyń otbasy birneshe jyl buryn Bangladeshten Boloná irgesindegi eldi mekenge qonys aýdarǵan eken. Kórshileri erli-zaıyptylardyń teris áreketin baıqamaǵan. Polısıanyń nazaryna da esh ilikpegen kórinedi. Keıinirek anyqtalǵandaı, ákesi men anasy balalaryna kúsh kórsetpegen, biraq psıhologıalyq qysym jasaǵan.Qyzdaryna úıden ata-anasynsyz shyǵýǵa, kóshede hıdjabsyz júrýge nemese ózimen qatarlas uldarmen sóılesýge tyıym salǵan. Aıtylǵandardy oryndamasa, qatań jazalaımyz dep qorqytqan.

Musylmandar qaýymynyń úılestirýshisi Iassın Laframnyń aıtýynsha, balaǵa kúshtep hıdjab kıgizý ıslam dinine qaıshy. Ár adam ony júrek qalaýymen jasaýy kerek.

Áleýmettik qyzmet qyzdardy ata-anasynan alyp qoıdy. Balalardyń taǵdyryn endi sot sheshedi.