Qazaqstannyń Qarýly Kúshterinde áskerı-medısınalyq mekemeler, túrler, ásker tekteri jáne óńirlik qolbasshylyqtardyń medısına qyzmetteriniń ókilderimen jıyn ótti.
Bul týraly Qamshy aqparat agenttigi QR Qorǵanys mınıstrliginiń baspasóz qyzmetine silteme jasap habarlaıdy.
Medısınalyq mamandar aldaǵy 5 jylǵa Qazaqstan Qarýly Kúshteri áskerı-medısınalyq qyzmetiniń perspektıvasy men damytý joldaryn talqylap, sondaı-aq, qol jetkizilgen jetistikter men oń nátıjelerdi, sonymen qatar, sheshýdi qajet etetin máselelerdi belgilep, 2016 jyl jáne 2017 jyldyń birinshi toqsany boıynsha jumysty qorytyndylady. Jıynǵa qatysý úshin QR Densaýlyq saqtaý mınıstrligi, Ulttyq ulan, QR İİM Tótenshe jaǵdaılar jónindegi komıteti, QR UQK Shekara qyzmeti medısınalyq qyzmetteriniń ókilderi shaqyryldy. Búginde QR QK áskerlerin medısınalyq qamtamasyz etý júıesi áskerı bólimderdiń medısınalyq bólimsheleri, áskerı emdeý mekemeleriniń jelisi, QR QM Ortalyq áskerı-dárigerlik komısıany, medısınalyq múlik pen tehnıkany saqtaý qoımalary, sanıtarlyq-epıdemıologıalyq mekemelerdi, sondaı-aq, medısınalyq personaldy, onyń ishinde, taktıkalyq býyndy oqytý jáne biliktilikti arttyrýmen aınalysatyn mekemelerdi qamtıdy.
Qarýly Kúshterdegi áskerı medısına salasy jyldan jylǵa sapaly jańa deńgeıge kóterilip keledi. Áskerı dárigerler zamanaýı álemdik medısınamen ilgeri qadam basyp keledi. Olar emdeýdiń jańa tehnologıalary men ádistemelerin zerdeleıdi, ony joǵary álemdik standarttarǵa saı keletin medısınalyq jabdyqty qoldana otyryp, is júzinde qoldanady. Barlyq emdeý mekemelerinde ártúrli aýrý-syrqaýlar kezindegi tekserý algorıtmderi ázirlendi. Bul naqty dıagnoz qoıýdy jedeldetedi jáne bastapqy kezeńderde kúrdeli aýrý-syrqaýlardy dıagnostıkadan ótkizýge, barabar em júrgizýge jáne durys saraptamalyq sheshim qabyldaýǵa múmkindik beredi.
