Almaty qalasyndaǵy jekemenshik aýrýhanalardyń birinde 26 jastaǵy er adam kóz jumdy, dep habarlaıdy «Qamshy» aqparattyq agenttigi Ktk telearnasyna silteme jasap.

Alekseı esimdi Almaty turǵyny dárigerge gaımorıt aýrýynan emdelýge barǵan. Qaza tapqan er adamnyń áıeli kináli adamdardy jazalaýyn talap etip otyr. Onyń aıtýynsha, kúıeýi eshqandaı da aýyr dertke shaldyqpaǵan, ómirine tónip turǵan qaýip joq edi. Táýelsiz ekspertter er adamda anafılaktıkalyq shok bolýy múmkin dep tuspaldap otyr.

26 jastaǵy Alekseı Gýbenkony jer qoınyna tapsyrǵanyna bir aıdan astam ýaqyt ótti. Alaıda, áıeli áli kúnge deıin onyń neden kóz jumǵanyn bilmeıdi. 6 naýryz kúni er adam gaımorıt aýrýyn emdetýge qalalyq jekemenshik aýrýhanalardyń birine barǵan, keıinnen birneshe saǵat ótkennen soń Vıktorıa kúıeýiniń ólgendigi jaıly habar aldy.

«Meniń jarymmen birge onyń dosy da bolǵan. Biraq ol prosedýralyq kabınetke kirmeı, syrtta kútip turǵan. Onyń a týynsha, meniń kúıeýimdi aldymen jýyndyryp, keıinnen prosedýralyq kabınetke alyp kirgen. Sol jerde jaǵdaıy nasharlapty», - dep málimdedi Vıktorıa Gýbenko.

Ólim týraly kýálikte er adam tunshyǵyp qaldy dep kórsetilgen. Alaıda, naqty sebebi áli belgisiz. «Aman-saýlyq» atty qoǵamdyq qorynyń aıtýynsha, dárilik preparattardan alergıasy bar adamdarda anafılaktıkalyq shok kóp bolady, bul er azamat ta sondaı jaǵdaıǵa dýshar bolǵan.

Vıktorıa Gýbenko polısıaǵa aryz jazyp, Densaýlyq saqtaý mınıstrligi men medısınalyq jáne farmasevtıkalyq jabdyqtardy qadaǵalaý komıtetiniń kómegine júgingen. Qazir solardan jaýap kútýde. Densaýlyǵyna eshqashan shaǵym keltirmegen eriniń aıaq asty bulaı ólip qalýynyń basqa sebebi bar ekendigine ol senimdi bolyp otyr.

«Meniń kúıeýim sap-saý qalpynda jáı ǵana gaımorıtin emdetýge baryp, keshke jaqyn aıaq astynan qalaı ólip ketýi múmkin? Maǵan osynyń naqty sebebin túsindirgenderin qalaımyn. Birneshe saǵat emes, tipti, birer mınýttardan keıin kóz jumǵan. Men ádildikke qol jetkizgim keledi. Meniń kúıeýimniń ólimine kináli adamdar ózderine laıyqty jazasyn alsa eken deımin», - dep aǵynan jaryldy Vıktorıa.

Jekemenshik aýrýhana qyzmetkerleri bul jaǵdaıǵa qatysty pikir bildirýden bas tartty. Sýdmedekspertızanyń nátıjesin bilmeıinshe, bul iske qatysty qandaı da bir aqparat bere almaıtyndyqtaryn aıtty.

Aýdarǵan: Nazerke Labıhan