QR Memlekettik qyzmet isteri jáne sybaılas jemqorlyqqa qarsy is-qımyl agenttigi memlekettik qyzmet bedelin túsiretin áreketter sanatyna ádep buzýshylyqtardyń jeke quramyn engizbek.  Bul jaıynda búgin atalǵan agenttik tóraǵasynyń orynbasary Alık Shpekbaev málim etti, dep habarlaıdy Qamshy AA QazAqparatqa silteme jasaı otyryp.

 Senattyń Halyqaralyq qatynastar, qorǵanys jáne qaýipsizdik komıtetinde ótken «QR-da sybaılas jemqorlyqqa qarsy is-qımyl máseleleri boıynsha zańnamany jetildirý» taqyrybyndaǵy dóńgelek ústel barysynda negizgi baıandama jasaǵan Shpekbaevtyń aıtýynsha, elimizde Ádep kodeksin buzǵan memlekettik qyzmetshilerge jaza jeńil. Máselen, olar qyzmettik kólikterdi jeke maqsatynda paıdalansa, azamattarǵa jáne qyzmettesterine dórekilik tanytsa, kólikti mas kúıinde basqarsa nemese mas kúıinde qoǵamdyq oryndarda júrse eskertý alady ne qatań sógis alyp qutylady. «Birden qatań sharalar qabyldaý qajet dep otyrǵanymyz joq. Degenmen, tym bolmaǵanda qyzmetine tolyq sáıkes kelmeıtindigin jarıalap, úsh jyl boıy joǵary turǵan laýazymǵa joǵarylaý quqyǵynan aıyrýǵa nemese laýazymyn tómendetýge bolar edi. Ary ketkende, ádep normasyn óreskel buzǵany úshin jumystan shyǵarý qajet», - dedi ol.

Osy rette Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva agenttik basshysynyń orynbasarynan memlekettik qyzmetshiniń azamattarǵa dórekilik tanytqanyn qalaı dáleldeýge bolatynyn surady. «Bizde jazba júrgizýge tyıym salynbaǵan. Árkimniń de mundaı múmkinshiligi bar. Mundaı shaǵymdardy qaraǵan kezimizde kópshiligi jazyp alyp, sonymen faktini dáleldep jatady. Qazirdiń ózinde 62 fakti boıynsha jaýapqa tarttyq. Mundaı faktilerge jol bergenderdiń basym bóligi memlekettik qyzmetshiler», - dep jaýap berdi Shpekbaev.