Ońtústik Koreıada oqıtyn qazaqstandyq stýdent Seýldiń mádenı-tarıhı aýdany - Bukchon village-de, áshekeı buıymdaryn satatyn kishigirim dúkenniń kireberisinen Ybyraı Altynsarın beınelengen kilemsheni kórgen. Bul týraly Vkontakte áleýmettik jelisinde jazyldy.
«Men Seýlde oqımyn. Jaqynda kóńilimdi túsirgen kórinistiń kýási bodym. Bukchon village-de áshekeı buıymdaryn satatyn kishigirim dúkenniń kireberisinen Ybyraı Altynsarın beınelengen tósenish tóselgen. Bul meni eseńgiretip jiberdi. Birinshiden, adam beınesi beınelengen kilemsheni tósenish etip, taptaýdyń ózi adamgershilikke jatpaıdy dep esepteımin. Ekinshiden, qazaqtyń alǵashqy pedagogynyń beınesin kórip, ne isterimdi bilmeı abdyrap qaldym», - dep jazdy post avtory.
Qazaqstandyq stýdent kilemsheni kireberisten alǵyzýǵa barynsha tyrysqanyn jazǵan. «Satýshylardan kilemshedegi beıneniń kim ekenin suraǵanymda «Bilmeımiz. Qytaılyq bireý shyǵar...», dep jaýap berdi. Olardyń birine jaǵdaıdy túsindire bastap edim, kelýshilerdiń kóp ekenin aıtyp, mazalamaýymdy ótindi. Ekinshi satýshyǵa bardym, ol meniń sózderime qulaq asty. Meniń sózderimniń rastyǵyna, Altynsarınnyń úlken tulǵa ekenine kóz jetkizý úshin satýshy Altynsarınniń sýretterin ınternetten kórsetýdi surady. Mán-jaıǵa kóz jetkizgen soń menen keshirim surap, kilemsheni alyp tastaýǵa ýáde berdi. Ókinishke oraı, satýshy kilemsheni meniń kózimshe alǵan joq, dúkende halyq qarasy kóp edi. Keıinirek dúkenge taǵy da baramyn», - dep sózin túıindedi stýdent.
