Jedel shatabtyń kóshpeli keńesi kezinde Qumar Aqsaqalov BAQ ókilderin taǵy da sý tasqyny týraly aqparattandyrdy. Sergeev sý qoımasynda sýdyń erneýden kóterilýi 1 metr 90 santımetrdi quraıdy dep habarlaıdy Qamshy aqparattyq agenttigi SQO ákiminiń Baspasóz qyzmetine silteme jasap.
«Shal aqyn aýdanynda eldi mekenderge tónip turǵan eshqandaı qaýip joq. Esil aýdanynda da jaǵdaı turaqtandy. Qazir mol sý Qyzyljar aýdany men Petropavl qalasyna jetti. Onda saıajaılar sýǵa ketti. Bul – jyl saıyn bolyp turatyn qalypty jaǵdaı. Shtab kún saıyn jumys isteýde, biz jaǵdaıdy baqylaýǵa alyp otyrmyz»,- dedi Qumar Aqsaqalov.
Sońǵy táýlikterde 118 adam, onyń 90-y – bala, jáne 147 bas mal qaýipsiz jerge kóshirildi. Zarechnoe aýylynda úıler sýǵa ketken joq. Jekelegen turǵyndar úılerin tastap ketýden bas tartýda. Óńir basshysy der kezinde jasalǵan evakýasıa múlik pen ómirdi saqtaý úshin qajet shara ekendigin atap aıtty.
«Petropavl qalasynyń jáne Zarechnyı kentiniń turǵyndaryna aıtarym: TJD qyzmetkerleriniń talabyn oryndaý jáne jaǵdaıdyń qıyndaýynan saqtaný úshin qaýipsiz jerge barý kerek. Turǵyndar soǵan múddeli bolýǵa tıis. Adamdardy, júkterdi jáne maldardy kóshiretin qajetti tehnıkalar bar. Biz mundaı mol sýdy buryn-sońdy kórgen joqpyz. Sondyqtan barlyǵyna daıyn bolý kerek»,- dedi óńir basshysy.
Jýrnalıserdiń saýaldaryna jaýap bere kelip, oblys ákimi Bylǵary zaýyty mańynda qalyptasqan jaǵdaıǵa toqtaldy.
«Ótken jyly 800 metrdeı jańa bóget turǵyzyldy. Ol jumys istep tur, qory da jetkilikti. Keshe biz sýdyń eski bógetke taqalǵany jóninde habar aldyq. Qazir odan sý asyp ketpes úshin, ony nyǵaıtý, ıaǵnı bıiktetý jumysymen aınalysyp jatyrmyz. Bul jumyspen keshe, túnde jáne búgin shuǵyldanýdamyz. Taǵy bir metrdeı kóterýimiz kerek»,- dedi Qumar Aqsaqalov.
Óńir basshysy Ǵ.Músirepov atyndaǵy aýdannyń Rýzaevka aýylyndaǵy jaǵdaıdy da aıtyp ótti. Onda 12 turǵyn úı zardap shekti. Ótken demalys kúni onda senbilik uıymdastyryldy.
«Rýzaevka aýylyndaǵy senbilikke qoǵamdyq uıymdardan, jastardan jáne qaıǵyly jaǵdaıǵa beıtarap qaraı almaıtyn jandardan 400-deı adam qatysty. Bir azamat aýrýhanada eken, oǵan baryp halin suradyq. Árıne, júregi aýyrǵandyqtan. Oǵan qajetti em-dom qoldanylypty. Turǵyn úılerdi oblystyq búdjet pen qaıyrymdylyq qarajaty esebinen ornyna keltiremiz. Mysaly, tehnıka búdjetten tys qarajat esebinen, ıaǵnı demeýshilerdiń kómegimen qalpyna keltiriledi»,- dedi oblys ákimi