Aýyzbastyryqty mıllıondap alǵanymen, abaqtyda alty aı da otyrǵan joq! Almaty soty byltyr mıllıon dollar paramen ustalǵan burynǵy "Qorǵas" halyqaralyq ortalyǵynyń basshysyn bosatty. Vasılıı Nıdiń kinásin birden moıyndaı qoıý jeńil jazaǵa sebep boldy dep túsindirdi sottaǵylar dep habarlaıdy ktk.kz.
Nıdiń qolyna byltyr qyrkúıekte kisen salynǵan. Jemqorlyqqa qarsy ulttyq búronyń málimetinshe, mıllıon dollarǵa ol halyqaralyq ortalyqtyń aýmaǵynda 5 juldyzdy qonaq úı salýǵa ruqsat etpek bolypty. Sóıtip, kelisilgen aýyzbastyryqty alýǵa Investorlarmen jumys bóliminiń jetekshisi Mahabbat Saıdýllaeva jumsaǵan. Biri para bopsalap, ekinshisi ony jetkizýmen aınalysqany úshin aıyp taǵylǵandar endi jazadan bosap otyr. Buryn isti bolmaǵan, kinásin de tez moıyndady, ári kishkentaı balasy bar dep ekeýin birdeı túrmeden shyǵarýdy prokýrorlardyń ózderi suraǵan eken. Sot ta bul ýájben tez kelise qoıǵan. Dese de, sottyń bul úkimin zańgerler túsine almaı otyr.
Johar Ótebekov, zańger:
-Kinásin moıyndaǵany úshin ǵana asa aýyr qylmys jasaǵan adamdy jaýapkershilikten bosatylǵanyn kópten beri estigen emespin. Bul jaǵdaıda dúnıe-múlkisi tárkilenbedi, aıyppul da salynbady. Tipti qyzmetin ary qaraı jalǵastyra berýge múmkindigi bar eken. Erekshe jumsaq úkimge paranyń somasy áser etken bolar.