Sáýirdiń ortasynda sý tasqyny saldarynan jalǵyz úılerinen aıyrylyp qalǵan Mahambetov aýylynda turatyn otbasynyń janaıqaıyn salǵan bolatynbyz. Osy jaǵdaıdy eskerip, 10 jastaǵy Mahabbat bılikke úndeý aıtty. Japa shekkenderge laıyqty kómek kórsetpegen bılikti aıyptap, bar ashýyn aıtyp salǵan.
Bul oqıǵadan soń jan-jaqtan kómektespek bolyp, qol ushyn sozǵandar tabylyp jatty. Sonyń biri ánshi Merýert Túsipbaeva boldy. «Kitaptarym sýǵa ketti» dep kóz jasyn tıa almaǵan kishkentaı qyzǵa ánshi kitaptar jiberdi, al 1 mamyr kúni qyzdyń qurmetine Aqtóbege baryp tegin konsert qoımaqshy.
Júregi meıirimge toly adadmdardyń áli de kóp ekeni kóńil qýantady. Almatylyq belgili kásipker Qaırat Qudaıbergen sý tasqynynan zardap shekken aqtóbelik 10 jastaǵy qyzǵa baspana syılamaqshy, dep habarlaıdy Qamshy aqparattyq agenttigi Dıapazonǵa silteme jasap.
«Sý tasqynynan zardap shekken qyzǵa úı salyp berýdi josparladyq, biraq keıinnen kóp kúttirmeı jaqsy eki qabatty úı alyp berýdi sheshtik, - dedi basylymǵa bergen suhbatynda Qaırat Qudaıbergen - Biz úlken ári ádemi, 159 sharshy metr aýmaqty qamtıtyn úıdi qarastyrdyq. Ony satyp alyp, Mahabbattyń otbasyna syılaǵymyz keldi. Úıge jıhazdardy, kir jýǵysh mashınany, teledıdar men basqa da tehnıkany apardyq. Biraq Aqtóbe ákimdigindegiler sol aýmaqtaǵy jer ýchaskesinde turýǵa bolmaıtynyn, ıaǵnı, úı ózenge tym jaqyn ornalasqandyqtan bas tartyp otyr. Alaıda úı bıik jáne ol ózennen alys ornalasqan. Endi basqa úı izdep jatyrmyz. Osy isti sońyna deıin tyndyryp, qyzǵa baspana syılamaqshymyz».
Búgingi tańda Mahabbat Eshimovanyń otbasy basqa da zardap shekken otbasylar sekildi jaldamaly páterde turyp jatyr.