27 sáýir kúni Qazaq memlekettik qyzdar pedagogıkalyq ýnıversıtetinde JOO-ǵa deıingi bilim berý men Mansap bóliminiń uıymdastyrýmen bıylǵy jyldyń bitirýshi túlekterine arnalǵan «Bos oryndar jármeńkesi» bolyp ótti dep habarlaıdy Qamshy aqparattyq agenttigi «Qyzdar ýnıversıteti» medıa ortalyǵyna silteme jasaı otyryp.
Sharaǵa ýnıversıtettiń 6 fakúltetinen 300-ge jýyq túlek qatysty. Jármeńkege Almaty oblysynan jáne Almaty qalasy aýdandyq bilim berý mekemelerinen 80-nen astam memlekettik uıymdar qatysty. Bitirýshi túlekter jumys berýshilermen kezdesip óz túıindemelerin berip, qajetti aqparattar ala aldy. Jármeńkede biraz jas saýalnama toltyryp, kelisimsharttarǵa qol qoısa, taǵy birazy yqpaldastyqqa qol jetkizdi. Jármeńkede jalpy 100-den astam bos oryn usynyldy. Kópshiligi, ár túrli pán muǵalimderi men mektepke deıingi mekemelerdiń tárbıeshi qyzmetteri. Jármeńkege qatysqan bilim mekemeleri ýnıversıtetimizde oqytylatyn barlyq pedagogıkalyq mamandyqtarǵa suranys joǵary ekenin aıtty.
Shara aıasynda Atyraý oblysynan kelgen jeke menshik «LETS» bilim berý ortalyǵynyń ókilderi stýdentterge sheberlik synybyn ótkizdi.
Jármeńkeden keıin jumys berýshi ókildermen Qyzdar ýnıversıtetiniń oqý isi jónindegi prorektory Ádilet Toıbaev kezdesý ótkizdi. Kezdesý barysynda bitirýshi túlekterdi jumysqa ornalastyrý boıynsha birqatar usynystar aıtylyp, talqylandy. Kezdesýge qatysqan jumys berýshi mekeme ókilderi basqa oqý oryndarymen salystyrǵanda Qyzdar ýnıversıteti stýdentteriniń bul jármeńkege degen qyzyǵýshylyqtary óte joǵary ekenindigin atap ótti. Shara sońynda Á.Toıbaev bolashaq jas mamandardy jumyspen qamtý máselesine aıryqsha mán berip, yqpaldastyqqa únemi múddelilik tanytyp júrgen uıymdar men mekeme basshylaryna rızashylyǵyn bildirdi.
«Kóp jaǵdaıda qoldaryna dıplomdaryn endi ǵana alǵan bitirýshi túlekter úshin jumysqa ornalasý qıyn bop jatady. Búgingi sharany uıymdastyrýdaǵy basty maqsatymyz sol jas mamandarǵa jumysqa turýǵa járdemdesý. Jyl saıyn osy sharalardyń arqasynda kóptegen stýdentterimiz jumysqa ornalasyp ketti. Máselen, ótken jyly bitirgen 1 800-den astam stýdenttiń 1500-i jumysqa ornalasty. Sondyqtan bul jármeńkeniń jastarǵa bereri mol», deıdi JOO deıingi bilim berý men Mansap bóliminiń basshysy Qalımash Elshibaeva.
