2030 jylǵa deıingi kezeńge Zeınetaqy júıesin jańǵyrtý týraly úkimettiń jasaǵan jańa tujyrymdamasymen tanysqan Májilistegi kompartıa fraksıasy ony halyqtyń joǵyn joqtaǵan qujat emes dep tapty.

Jalpy, zeınetaqy jınaqtaý júıesi ortasha eńbekaqydan artyq alatyndarǵa ǵana tıimdi ekeni baıaǵydan belgili bolǵan. Bizdiń, aýylda turatyn 7,7 mln. aǵaıynnyń jumys isteıtininiń ortasha eńbekaqysy 64500 teńge ǵana. Al jekemenshik qosalqy sharýashylyǵy jáne basqa da tabys kózderimen ózin-ózi asyrap otyrǵandarynyń aılyq ortasha tabysy jan basyna shaqqanda tipti 32400 teńge ǵana. Osyndaı tabyspen olar qarttyǵyn qamtamasyz ete alatyn zeınetaqy qordalandyra ala ma? Árıne, qordalandyra almaıdy. Demek, árkim ózderine ózi qordalandyrsyn degen myna tujyrym aqsaqaldarymyzdyń negizgi bóligin erteńgi kúni qıyn jaǵdaıǵa tap qylatyny sózsiz.

Onyń ústine zeınetaqy qorynyń tabystylyǵyn arttyrý máselesi de «Qazaqstannyń qarajat sektoryn damytý» atty tujyrymdamasyna enedi degen úmit te kesilip otyr. Búgingi kúni zeınetaqy qoryndaǵy qarajat barlyq bank aktıvteriniń tórtten birin quraıdy. Alaıda soǵan qaramaı onyń qarajat sektorynyń qataryna engizilmegeni qyzyq. Eger qarajat sektoryna engizilse ony ınvestısıa retinde ósimdi jobalarǵa salýǵa bolatyn edi. Sóıtip, ózdiginen tabys tabýǵa jol ashylatyn edi ǵoı.

Atalmysh tujyrymdama zeınetaqy qoryna tek bankterdiń turaqtylyǵyn saqtaý men qordalandyrý rólin ǵana bergen. Bul – zeınetaqy qory tek bankige qyzmet etedi degen sóz. Sondyqtan onyń ósimi týraly sóz qozǵaýdyń ózi artyq.  Májilistiń sońǵy plenarlyq otyrysynda komýnıser fraksıasy depýtat Aıqyn Qońyrovtyń aýzymen osyndaı máselelerdi aıta kelip, Premer-mınıstr K.Másimovten mynadaı máselelerge jaýap berýin surap, depýtattyq saýal joldady:

«Biz joǵaryda ózin-ózi asyrap otyrǵan tabysy az turǵyndar men eńbekaqysy tómen jandardyń jınaqtaǵan qory múlde az bolatynyn aıttyq, sonda úkimet olardy erteńgi kúni zeınetaqymen qalaı qamtamasyz etpek?

Azamattardyń zeınetaqy qorynynyń tabystylyǵyn  arttyrý týraly úkimet qandaı sharalar josparlap otyr? Eger ondaılar bar bolsa, aıtýyńyzdy ótinemiz.   

 Sonymen qatar komýnıser K.Másimovke zeınetaqy qorynyń qarajatyn qalalarda turǵyn-úıler salýdy ınvestısıalaýǵa jumsaý kerektigin aıtyp, usynys jasady. Sonda bul qarajat joǵalmaı, elimizdegi turǵyn-úı máselesiniń sheshilýine qatysyp, ǵımarat retinde qalqaıyp turar edi ǵoı dep oılaıdy komýnıser. Biraq olardy ózim ǵana bilemin deıtin úkimet qoldaı qoıar ma eken? Ony endi bolashaq kórsetedi.  

A.Alpysbaev