Google korporasıasy 438 mıllıon rúbl kólemindegi ákimshilik aıyppulyn tóledi. Oǵan sebep – monopolıaǵa qarsy zańnamany buzý, dep habarlaıdy Qamshy aqparattyq agenttigi Reseıdiń Federaldy monopolıaǵa qarsy qyzmetine silteme jasap.

Janjal eki jylǵa sozylǵan: 2015 jyldyń aqpanynda reseılik «Iandeks» kompanıasy Google-diń ústinen aryz túsirdi. Sebebi Android operasıalyq júıesinde ornatylǵan qoldanbalar naryǵynda ústemdigin teris paıdalanǵan.

2015 jyldyń kúzinde Federaldy monopolıaǵa qarsy qyzmet «Iandekstiń» talabyn ádiletti dep tanyp, Google-diń tártibin retke keltirmek bolǵan. Al Google bul aryzǵa shaǵymdanatynyn aıtqan, alaıda shaǵymdary sátsiz aıaqtaldy.

2016 jyldyń naýryzynda Reseıdiń Federaldy monopolıaǵa qarsy qyzmetiniń basshysy Igor Artemev Google-diń agressıvtiligin aıyptap, sol jyly-aq eki aı saıyn aıyppul tóletip turýǵa ýáde bergen.

2017 jyldyń sáýirinde monopolıaǵa qarsy qyzmet pen Google álemdik kelisim jasap, sot isterine núkte qoıyldy. Ǵalamtor alyby 438 mln rúbl kóleminde aıyppul tóleýge mindetteldi.

Sondaı-aq, álemdik kelisimniń shartyna sáıkes, Google Android júıesindegi eksklúzıvti mobıldik qurylǵylardan bas tartady jáne úshinshi jaqty qoldanbalardyń ornatylýyn tejemeıtin bolady.

Smartfon óndirýshileri Google-men komersıalyq kelismiderge kele alatyn bolady, sonymen qatar kez-kelgen qoldanbany ornata alady, al Amerıkanyń ǵalamtor alyby buǵan qarsy kele almaıdy.

«Bizdiń oıymyzsha, óndirýshilerde tańdaý bolýy qajet  - smartfondary men planshetterindegi izdeý júıesi qandaı bolatyny, tipti qandaı qyzmet ornatsa da óz erki», - dedi «Iandeks» kompanıasynyń ókili Ochır Mandjıkov.

Sholýshy: Gúlim Jaqan