Sonymen qatar áskerı qyzmetshilerdi de tizimnen alyp tastaý máselesi kóterilýde. Olar jeke kezekke turǵyzylady jáne olar úshin nesıeleýdiń jeńildikti sharttary qarastyrylatyn bolady, dep habarlaıdy Elorda.info.

Memlekettik qor baspanasy kezeginde turǵan repatrıanttardy kezekten alyp tastaý usynylýda, dep habarlady qalalyq turǵyn úı basqarmasynyń basshysy Rýslan Ahmetov máslıhattyń turaqty komısıalarynyń otyrysynda.

«Biz birneshe márte usynys jasadyq jáne sol pikirde qalamyz, atalǵan kategorıany kezekten alyp tastaý qajet. Bizdiń usynysymyz qazir úkimette qyzý talqylanyp jatyr», — dedi R.Ahmetov.

Onyń aıtýynsha, múlikti menshikten shyǵarǵannan keıingi bes jyldyq merzim máselesin Astana ákimi de qarap jatyr.

«Eger adam memlekettik qordan bir márte páter alǵan bolsa, onyń taǵy bir baspana alýyna shekteý qoıý kerek», — dep atap ótti ol.

Belgili bolǵandaı, oralmandar kvota boıynsha Qazaqstan aýmaǵyna osyndaı quqyq beretin óńirlerdiń biri arqyly kire alady da baspana ornyna aqshalaı ótemaqy alady, al muny derekqorǵa engizý múmkin emes, keıin elordaǵa kelip baspana alý kezegine tura alady.

Kezekke turar kezde turǵyn úı basqarmasy birinshi kezekte elordadaǵy úsh jyldyq tirkelýdi jáne elimiz aýmaǵynda baspanasynyń bar-joǵyn tekseredi.

«Vechernáá Astana» gazeti habarlaǵandaı, R.Ahmetovtyń aıtýynsha, munymen birge, baspana tiziminen áskerı qyzmetshilerdi alyp tastaý máselesi de tur, olar bólek kezekke turǵyzylady jáne olar úshin nesıeleýdiń jeńildikti sharttary oılastyrylady.

Osylaısha basqarma mamandary kezekte turǵan adamdardyń sanyn eki ese azaıtpaq.

Búgingi kúni komýnaldyq turǵyn úı qory baspanasyna zárý adamdardyń sany — 45 516.

Resmı málimet boıynsha, 25 jyl (1991 jyldyń 1 qańtary men 2016 jyldyń qańtary) ishinde Qazaqstanǵa 957 764 qandasymyz oralǵan, eger olardyń balalaryn, sonymen birge memlekettiń baǵdarlamasynyń kómeginsiz kelgenderdi qosa esepteıtin bolsaq – 1 mln adamnan asady (elimizdegi qazaqtardyń 10%-i).

Oralmandar Ońtústik Qazaqstan, Almaty, Mańǵystaý oblystarynda, onyń ishinde Jańaózen, Almaty, Astana men Taraz qalalarynda kóbirek qonystanǵan.

Sońǵy tolqyn oralmandarynyń basym bóligi jumys ońaı tabylatyn elordaǵa nemese oblys ortalyqtaryna qonystanýǵa umtylýda. 2014 jyldan beri Astana men Almaty qonys aýdarýǵa bolatyn qalalardyń tizimenen alynyp tastalǵan.