Nájjar uldary rýynan hrıstıan bir adam bar edi. Keıin musylman boldy. Baqara jáne Álı-Imran súrelerin oqıtyn. Hazireti Paıǵambarymyzdyń ﷺﷺ hatshylyq qyzmetin atqaratyn. Bul adam birshama ýaqyttan keıin musylmandardyń arasynan qashyp, qaıtadan hrıstıan boldy. Sóıtip «Muhammed meniń ózi úshin jazyp bergenderimnen basqa eshteńe bilmeıdi» deı bastady. Hrıstıandar men ıahýdıler álgini tóbelerine kóterdi. Bir kúni bul adam ólip, hrıstıandar ony jerlerdi. Ertesi kúni tańerteń álgi adam syrtta jatqan. Jer qabyldamaǵan. Buǵan hrıstıandar:

– Bul Muhammedtiń sahabalarynyń isi. Dinderin tastap, qashyp ketkendigi úshin dosymyzdyń qabirin ashyp, máıitin syrtqa laqtyryp tastady, – deı bastady. Sóıtti de álgini qabirdi taǵy da tereńirek qazyp, qaıta kómdi. Ertesi kúni tańerteń álgi adamnyń taǵy da syrtta jatqanyn kórdi. Bul joly da:

– Buny Muhammedtiń sahabalary jasady. Dinderin tastap ketkendigi úshin dosymyzdyń mazaryn ashyp, denesin syrtqa shyǵaryp tastady, – dedi.

Osy joly qabirdi qoldarynan kelgenshe tereń qazyp, álgi dostaryn taǵy da jerledi. Biraq báribir tańerteń álgi jer betinen tapty. Jer qoınaýyna qabyldamaı, taǵy da syrtqa shyǵaryp tastaǵan eken. Osydan keıin hrıstıandar bul istiń adam qolynan kelmeıtinin túsindi de, dostaryn sol kúıi sol jerinde tastap ketti.