Astana qalasynyń jekelegen sanattaǵy turǵyndary úshin JOO-nda grantpen oqýǵa múmkindik bar. Jetim balalar, balalar úıiniń túlekteri, jastaıynan múgedek, kóp balaly otbasynyń balalary men ata-ana qamqorlyǵynsyz qalǵandar oqýdyń aqshasyn tóleýge qatysty áleýmettik kómekke ıe bola alady dep habarlaıdy Qamshy aqparattyq agenttigi Astana qalasy ákimdiginiń Baspasóz qyzmetine silteme jasap.  

Tólemder joǵary oqý oryndarynyń bekitken baǵasyna saı júrgiziledi jáne qala búdjetiniń osy maqsatqa dep arnaǵan jyldyq búdjet kólemine qaraı beriledi. UBT qorytyndysy boıynsha kimniń kórsetkishi joǵary sol úmitkerdiń áleýmettik kómekti ıelenýge múmkindigi mol. Eń tómengi tıisti baldy jınaı almaǵan túlekke tólem múldem qarastyrylmaıdy. Úmitkerler 2017 jyldyń 1-tamyzyna deıin Astana qalasynyń jumyspen qamtý, eńbek jáne áleýmettik qorǵaý basqarmasyna ótinish jazýlary tıis. Ótinishpen birge: jeke kýáliktiń kóshirmesi; meken-jaı anyqtamasy; otbasy quramy týraly anyqtama (otbasy músheleri); otbasy músheleriniń tabysy týraly anyqtama; múgedektigi týraly anyqtama kóshirmesi (jastaıynan múgedekter úshin); ata-anasynyń qaıtys bolǵany týraly kýáliktiń kóshirmesi (jetim balalar úshin); kóp balaly otbasynyń múshesi ekenin rastaıtyn qujattyń kóshirmesi (kóp balaly otbasynyń balalary úshin); týý týraly kýáliktiń kóshirmesi; UBT qorytyndysy boıynsha beriletin memlekettik sertıfıkattyń kóshirmesin tapsyrýlary tıis. Barlyq qujattardyń túpnusqasy men kóshirmesi qabyldanady. Qujattardy tekserip bolǵan soń túpnusqa ıesine keri qaıtarylady.

Joǵary oqý oryndarynyń kúndizgi bóliminde oqıtyndarǵa beriletin áleýmettik kómek Astana qalasy máslıhatynyń 2014 j 27-maýsymdaǵy № 250/36-V bekitilgen sheshimine saı jekelegen sanattaǵy kómekke muqtaj azamattarǵa áleýmettik kómek kórsetý erejesine sáıkes orta eseppen jan basyna shaqqandaǵy tabys boıynsha, eń tómengi kúnkóris deńgeıinen 3 ese mólsherinen aspaıtyn aqshalaı tólemaqy retinde beriledi.