Ibrahım paıǵambardyń (ǵ.s.) qulshylyq jasaıtyn ózine tán jeke bólmesi bar dep jazady Qamshy aqparattyq agenttigi muslim.kz-ke silteme jasaı otyryp. Bul minájat etip, Jaratýshynyń qudiretine myń márte shúkir eter jaıly da tynyshtyq saltanat qurǵan oryn bolatyn. Áldebir sharýa ýaqytynda kilttep ketetin.

Bir kúni ishke kirgende, bólme ortasynda turǵan bóten bireýdi kóredi. Bosaǵasy bekitýli shańyraqqa qalaı kirdi degen oımen tańyrqap: «Seni kim kirgizdi?!» – dep suraıdy. Beıtanys adam: «Meni osy úıdiń ıesi kirgizdi», – deıdi. Ibrahım (ǵ.s.): «Bul úıdiń ıesi menmin», – deıdi. Álgi kisi: «Senen de, menen de burynǵy osy mekenniń ıesi kirgizdi», – dep, Jaratýshyny meńzedi.

Haziret Ibrahım (ǵ.s.) onyń Ázireıil perishte ekenin bilip: «Áı, Ázireıil, maǵan múmın quldardyń janyn alardaǵy beıneńdi kórsetshi?» – dep ótindi. Ázireıil: «Onda artyńa buryl», – deıdi. Ibrahım (ǵ.s.) artyna burylyp, az ýaqyttan keıin qaıta qaraǵanda, tym kelbetti, tartymdy, kıimi sándi, hosh ıisti, jap-jas jigittiń turǵanyn kóredi. Sol kezde haziret Ibrahım (ǵ.s.): «Múmın kisige óler aldynda seni osyndaı kelbette kórýdiń ózi jetkilikti marapat qoı», – degen eken.