Brent markaly munaı baǵasynyń barreline 80 dollar bolyp túzilýine qatysty elimizdiń Ulttyq banki teńgeni 15,5 paıyzǵa qunsyzdandyrýy múmkin. Budan baryp bir dollardyń quny 220 teńgeni quraýy ǵajap emes. Nur.kz jańalyqtary jazýynsha, bul týraly búgin Qazaqstan-Reseı qor naryǵynyń jaıyn baqylap, baǵdarlap otyratyn Renaissance Capital aqparattyq qarjylyq ortalyǵy osyndaı málimet taratqan.
Atalmysh ortalyq mamandarynyń paıymdaýynsha, Qazaqstannyń jalpy ishki ónimi munaı baǵamy barreline 100 dollar bolǵanda 4,8-4,5 paıyz bolýy kerek. Degenmen álemdik bırjada munaı baǵamynyń ár apta saıyn tómendep jatqanyn eskersek, 2015 jyly Qazaqstannyń jalpy ishki ónimi 4,1 paıyzdy quraýy ábden múmkin eken. Ulttyq bank mundaı jaǵdaıda teńgeni 15,5 paıyzǵa qunsyzdandyrýy múmkin. Budan baryp bir AQSH dollary 220 teńgeni quraıdy. Import-eksport ara-qatynasyn retteý úshin Qazaqstan osyndaı qadamǵa barýy ǵajap emes.
Buǵan qosa mamandar Qazaqstan úshin tómendegideı jaısyz aqparat tartqan: "Eger munaıdyń bir barreli 2015 jyly 60 dollardy quraıtyn bolsa, onda Qazaqstannyń JİÓ kúrt tómendeıdi. Al 2015 jyly munaı baǵasy 50 dollardan tómendese, onda eldiń ekonomıkasy quldyraıdy. Bul 2009 jylǵy oryn alǵan qarjylyq daǵdarysty qaıtyp ákeledi. Munaı baǵasynyń tómendeýine qatysty ekonomıkalyq jaǵdaıdyń ýshyǵa túsedi. Sondyqtan bul biraz elderge aýyr soqqy bolady"
Al álem elderin alańdatqan qara altyn qunyndaǵy ózgeriske bas qatyrýdy qajet dep tappaıtyn elder de bar. Máselen, OPEK-ke múshe munaı óndirýshi alpaýyttardyń biri Saýd Arabıasy aldaǵy ýaqytta munaı quny barreline 90 turmaq, 80 dollarǵa tússe de, murtymyzdy balta shappaıdy degendeı syńaı tanytyp otyr eken. Tipti, arab eli baǵanyń quldyraýynan paıda da tabýǵa nıetti. Óıtkeni baǵanyń tómendeýinen óndirýshiler jańa ınvestısıa tartýdy toqtatady. Bul munaıdy muhıt túbindegi tereńdikten, tipti AQSH-taǵy qatparly munaı ken oryndarynan óndirý jobasyn da toqyratýy yqtımal. OPEK elderine tıesili munaıdyń úshten bir bóligi Saýd Arabıasynyń enshisinde. Baǵany odan ári quldyratpas úshin, kóptegen elder munaı kólemin qysqartyp jatyr. Al kúnine 9,7 mln barel munaı óndiretin Saýd Arabıasy bıligi ol jaıynda tipti oılanbaıdy.
Qamshy-aqparat
