Qazaq tilin Google Translate júıesine qosý jobasy ekinshi kezeńge ótti. Bnews.kz-tiń habarlaýynsha, bul týraly búgin Ortalyq komýnıkasıalar qyzmetinde ótken brıfıńte «WikiBilim» qory qamqorshylar keńesiniń tóraǵasy Raýan Kenjehanuly málim etken.

 «Osy bastamany qolǵa alǵan kezde Google-men baılanysqa shyqtyq, olar bul jumysty ózderi jasaı almaıtyndyǵyn, biraq platformanyń jańa tildi qabyldaýǵa daıyn ekenin jetkizdi. Biraq bul úshin sol tilde sóıleıtin ortanyń ózi júıeni aǵylshyn jáne qazaq tilderindegi óte kóp, qatesiz aýdarma materıaldarmen qamtamasyz etý kerek boldy. Sonyń negizinde Google-dyń aýdarma júıesi qazaq tilin ıgerip alyp kete alady. Bul jumystyń bári atqaryldy. Birinshi kezeńde óte kóp mátinder salyndy», - deıdi Raýan Kenjehanuly.

«Ekinshi kezeńde Google bizge habar berip, endi jasalǵan aýdarmalardy baǵalaý kerek degen ótinish aıtty. Bılaın Qazaqstan kompanıasynyń kómegimen tilshi mamandar aralasyp, aýdarma sapasyn bir ret baǵalap shyqtyq. Endi aýdarmalardy taǵy bir ret qarap, olardy bekitý kerek. Búgingi múmkindikti paıdalanyp, tilge jany ashıtyn qaýymdastyqqa taǵy bir márte ótinish aıtqymyz kelip otyr. Osy júıege kirip, aýdarmaǵa baǵa berip, durys bolsa ony quptap, odan da kóbirek eńbek sińirýge ýaqyt jáne kúsh bolsa, qosysha aýdarma jasaý arqyly osy júıeni tezirek iske qosýǵa atsalysýǵa bolady», - degen ótinishin bildiredi R.Kenjehanuly.

Til janashyrlary http://translate.google.kz/community siltemesi arqyly ótip, «Google Translate + Kazakh» jobasyna óz úlesin qosa alady. El azamattary nemquraılylyq tanytpaı, bul ıgi iske bir adamdaı jumylsa, qazaq tili Google Translate júıesine 2014 jyldyń sońyna deıin qosylady.

Qamshy-aqparat