Almatyda týǵan qyzynyń emine halyqtan jylarman bolyp aqsha surap, izinshe jınalǵan qarajatty basqa maqsatqa jumsaǵan áıel aıypty dep tanyldy. Bostandyq aýdandyq soty Aqmaral Jaqsylyqovanyń áreketin zańsyz dep taýyp, qaıyrymdylyq qorynan oǵan berilgen 12 mln teńgeniń 10 mln. teńgesin qaıtaryp berý týraly sheshim shyǵardy. Eriktiler álgi aqshany byltyr nebári 2 aıda jınap, muqtaj janǵa tapsyrǵan eken. Alaıda, búırekke zárý bolǵan Janel Jaılaýovanyń anasy belsendi jastar tabystaǵan qarjynyń teń jartysyn ózge qajettilikterine jaratyp jiberipti. Al, kelisimshartta qomaqty qarajat tek naýqas qyzdyń otasyna ǵana jumsalýy kerek dep kórsetilgen. Osy tusta, 12 jastaǵy Janelge operasıa Úkimet tarapynan tegin jasalǵan. Al, qajetti aǵzany qyzdyń týysy óz erkimen bergen eken. Osyny eskergen sot birneshe aıǵa sozylǵan daýly iske núkte qoıdy. Endi aıyptalýshy tarap sottyń sheshimin 1 aıda daýlap, appelásıalyq shaǵym túsire alady dep habarlaıdy Qamshy aqparattyq agenttigi almaty.tv/kz-ke silteme jasaı otyryp.    

«Bostandyq aýdandyq sotynyń sheshimimen, Aqmaral Jaqsylyqova aıypty dep tanylyp, eriktilerge 10 mln. teńge qaıtaryp berýge mindetteledi. Qalǵan 2 mln. teńgeni  basqa qaıyrymdylyq qory bólgendikten, ol aqsha qaıtarylmaıdy. Sot sheshimi kúshine engen kúnnen bastap, aıyptalýshylar ony 1 aıda qaıta qarap, appelásıalyq shaǵym túsire alady», - dedi sýdıa Áıgerim QALIEVA.

Este bolsa, byltyr jazda bizdiń tilshiler Janel Jaılaýovanyń jaǵdaıyn kórsetken edi. Ol kezde qarshadaı qyz Aqsaı balalar aýrýhanasynda em qabyldap jatqan. Dárigerler naýqasqa shuǵyl túrde búırek qajet dep, donor izdeýge kirisedi. Keıin tap sondaı otanyń Izraılde jasalatyny málim bolady. Operasıa quny shamamen 30 myń evroǵa baǵalanǵan. İzinshe, jaǵdaıy jutań otbasy sharq uryp, halyqtan jylý jınaýǵa kirisedi. Bul iske Almatynyń eriktiler toby da jumylyp, tıisti aqshany jınaýǵa septikterin tıgizgen edi.  Endi qaıtarylǵan aqshany eriktiler toby járdemge muqtaj basqa balalardyń emine jumsaýdy kózdep otyr.