Adamnyń meıirimi sheksiz, tek sony kórsete alý adamnyń óz qolynda. Máselen, Tehas shtatynyń turǵyny Melına Salazer asqan meıirimdiliginiń arqasynda kútpegen tosyn syıǵa ıe boldy.

Salazer Tehas shtatyndaǵy Braýnsvıll qalasynda 16 jyl boıy daıashy bolyp qyzmet atqaryp keledi. 16 jyldyń ishinde myńdaǵan kelýshilerge qyzmet kórsetti. Alaıda bir klıent daıashy qyzdyń esinde máńgilikke saqtaldy.

«Ol óte dóreki bolatyn. Kelgen saıyn janjal shyǵaryp ketedi», dep aıtty Salazer meıramhananyń turaqty klıenti jaıynda.

Álgi turaqty klıenttiń esimi Svord bolatyn. Ol – Ekinshi dúnıejúzilik soǵystyń ardageri, jasy 89-da, 7 jyldan beri osy meıramhanadan turaqty túrde tamaqtanyp keledi. Ózgelerdiń zyǵyrdanyn qaınatatyn ádeti kóp edi: daıashydan múmkin emes dúnıeni talap etetin, tamaǵy jyly bolsa da, ysytyp ákelýin suraıtyn.

Alaıda Salazer ony árdaıym shynaıy kúlkisimen qarsy alatyn. Ýaqyt óte kele Salazer ardagerdiń oıyn oqıtyn dárejege jetti.

«Men oǵan tek qamqorlyq tanytqym keldi».

Ótken jyldyń jaz aıynda Svord meıramhanǵa kelýin doǵarady. Salazer nekrologtardyń tiziminen onyń esimin tappaıynsha, ne bolǵanyn bilmegen. Ardager ómirden ozdy.

Sóıtip ýaqyttar jyljı berdi. Rojdestvoǵa birneshe kún qalǵanda Salazerdi kútpegen tosyn syı kútip turdy: dóreki klıent oǵan ósıet retinde $50000 qaldyryp ketken.

«Óz kózime ózim senbedim. Oılasam, denem áli kúnge deıin titirkenedi», deıdi Salazer.

Meıirban daıashy eshqashan qamqorlyq kórmegen adamǵa kórsetken meıirimdiligi úshin tosyn syıǵa ıe body, ony ómirdiń ózi marapattady.

«Meniń armanym - álemdegi barlyq daıashylar bizdiń batyrlarymyzǵa laıyqty túrde qamorlyq tanytyp, meıirimdiligin tókse eken», dep sózin aıaqtady Salazer. 

Sholýshy: Gúlim Jaqan