Atyraý oblysynyń Qurmanǵazy aýdandyq sotyna talap aryz berýshi D. esimdi azamat mektep basshylyǵynyń qyzyna sabaqqa oramal – kımeshek kıip kelýge ruqsat etpegendikten, oqýshy sabaqtan qalǵanyn málimdedi, dep habarlaıdy Qamshy aqparattyq agenttigi baq.kz-ke silteme jasaı otyryp.

Aryzda D. qyzyn dástúrli dinı mádenıetke tárbıeleıtinin, jas kezinen kımeshek kıýge daǵdylandyryp júrgenin jazǵan. Sotta anyqtalǵandaı, 2016 jyldyń qyrkúıek aıynyń basynda mektep ákimshiligi talap qoıýshyǵa Bilim jáne ǵylym mınıstrliginiń buıryǵyna sáıkes mindetti mektep kıimi úlgisi saqtalýy tıis ekenin eskertip, qyzdy mundaı kıimmen oqýǵa qabyldaýdan bas tartý týraly jazbasha hat tabystaǵan. Naýryz aıynda ata-ana qyzyn oqýǵa qaıtyp ákelgisi keletinin habarlaǵanymen, aıtqanyn oryndamaǵan. Sondaı-aq, ata-ana aýdan ákimi janyndaǵy kámeletke tolmaǵandardyń isi jónindegi komısıa otyrysyna barýdan bas tartqan.

«Atalǵan isti qaraǵan sýdıa Bilim jáne ǵylym mınıstrliginiń kıim úlgisin saqtaý týraly talaby zaıyrlylyqqa,tepe-teńdikke jaýap beretinin, elimizdiń memlekettik qurylymynyń prınsıpine sáıkes keletinin túsindiredi. Bul zań normalary barlyq konfesıa men ult ókilderi úshin ortaq bolyp tabylady, oqýshylardyń dinı kózqaras bostandyǵyna quqyqtaryn shektemeıdi. Ata-analardyń dinı betburysy tulǵanyń oqýy men damýy jolynda kedergi keltirmeýi tıis», - delingen oblystyq sot baspasóz qyzmetiniń habarlamasynda.

Osylaısha, sot elimizdiń «Bilim týraly» Zańyn basshylyqqa ala otyryp, ata-analar jáne basqa da zańdy tulǵalar bilim berý mekemesiniń belgilengen erejelerin oryndaýǵa mindetti dep sanaǵan.

Bilim jáne ǵylym mınıstrliginiń buıryǵyna sáıkes, mektep kıimi úlgisine túrli konfesıalardyń dinı kıim úlgisiniń elementterin qosýǵa jol berilmeıdi. Derekkózi osyǵan baılanysty sot azamat D.-nyń talap aryzyn qanaǵattandyrýdan bas tartqanyn habarlaıdy.