Burynǵy kezderi «ajyrasyp ketipti» degen jaman sózdi tipti de estimeıtin edik. Al qazir jıi estıtin boldyq dep jazady zamana.kz. 

Tipti eki-úsh jyl birge júrip úılense de jarty jylǵa jetpeı ajyrasyp jatqandar bar. Sondaı-aq bir-birin unatqan jastarǵa ata-anasy kedergi keltiretin oqıǵalardy da estıtin boldyq.

Taıaýda maǵan jaqyn qurbym qońyraý shaldy. Daýsynan ábirjý, asyǵystyq bilinedi. «Jaqsy qyz bolsa taýyp bershi maǵan. Eki-úsh kún arasynda turmysqa shyǵatyn qyz kerek bolyp tur», – deıdi. Men onyń munysyn onsha túsinbeı qaldym. Oıym san-saqqa ketti. Sodan ne bolyp qaldy eken dep onyń úıine barǵanmyn.

Barsam, qurbymnyń úıinde kóp adam jınalyp, bir nárseni qyzý talqylap otyr. Sol jerde qyz izdegen jigittiń de baryn bildim.  Esimi Erlan eken. Barlyq mán-jaıdy maǵan sol aıtyp berdi.

Erlan osydan eki jyl buryn Názıra esimdi qyzben tanysyp, ekeýi jaqsy aralasypty. Keıin Erlan ony óziniń úı-ishimen tanystyrady. Názıra jigittiń ata-anasyna da qatty unap qalady. Sodan áke-sheshesi Erlanǵa bıyldan qalmaı úılen, áıtpese mynadaı qyzdan aıyrylyp qalasyń deýdi jıiletipti.

Sodan eki jastyń ata-anasy tanysyp, bir dámhanada «tátti shaı» ishken. Biraq Názıranyń áke-sheshesi eki jastyń úılenýlerine úzildi-kesildi qarsy bolypty.

Biraq arada birneshe kún ótkennen keıin Erlan Názırany alyp qashyp ketedi. Óziniń kelisimimen. Bul kezde Erlannyń úıi qyzý daıyndyq ústinde eken. Anasy qatty qýanyp, Názıranyń mańdaıynan súıip, oń aıaqpen tabaldyryq attatqyzady. Betasharǵa qyzý daıyndyq bolyp jatqan kezde habarshyǵa adamdar ketedi.

Alaıda jınalǵan jurtqa tamaq berilip, betashar­ǵa daıyndalyp jatqan kezde Názıranyń ákesi tórgi bólmege ashýly kúımen kirip kelip aıqaıǵa basa jóneledi. «Sot­qa beremin! Men senderge qazaqshalap aıttym ǵoı qyzymdy bermeımin dep!» – degen ol Názıranyń basyndaǵy oramaldy julyp alyp laqtyryp jiberipti. Qyzynyń: «Osy úıden ketpeımin. Erlandy jaqsy kóremin», – dep eńirep jylaǵanyna qaramaıdy. Uryp-soǵyp, aýylyna áketip qalady.

«Názıraǵa obal boldy. Obalyna qaldym-aý! Ata-anasynyń ondaı adamdar ekenin qaıdan bileıin?..» – degen Erlan muńaıyp otyryp qaldy. Kózinen jas shyǵyp ketti.

...Qysqasy, ata-anasy toıǵa daıyndalyp qoıǵan Erlanǵa sol kúni aıaq astynan bireýdi alyp kelý kerek bolypty. «Eki-úsh kúnniń ishinde turmysqa shyǵatyn qyz» izdeý sodan bastalǵan eken.

Bul jerde men ákeniń óz qyzynyń taǵdyryna sonshalyqty qatygezdikpen qaraǵanyna tańmyn. Perzentiniń kóz jasy selt etkizbegen ol kisiniń sondaǵy armany ne eken? Baı jermen quda bolǵysy keldi me? Olaı deıin deseń, Erlannyń otbasy da jerge qarap otyrǵan joq, bir aýylǵa bedeli bar otbasy eken.

Qalaı bolǵanda da eki jastyń júregine jara tústi. Oǵan qyz ata-anasynyń sebepker bolǵany ókinishti.

R. ÓMİRJANQYZY