Elbasy kórmeniń basty nysany bolyp tabylatyn «Nur Álem» pavılonyn aralady, dep habarlaıdy Qamshy aqparattyq agenttigi Aqordaǵa silteme jasap.

 Bul – dıametri 80 metr shar túrinde salynǵan álemdegi birden-bir ǵımarat. Pavılonda «Bolashaqtyń energıasy mýzeıi» ornalasady, onda Qazaqstanmen tanysý aımaǵy bolady, sondaı-aq energıanyń negizgi túrleri usynylady.   

Qazaqstan Prezıdentine «Bolashaq Astana – Qazaqstannyń 2050 jylǵy elordasy» ekspozısıasy, ǵarysh energıasy zaly, qazaqstandyq 28 ǵylymı jobany jáne «Jasyl ekonomıka» tujyrymdamasy jónindegi jobalardy qamtıtyn «Jasampaz energıa» aımaǵy, sondaı-aq Qazaqstannyń «Tokamak» materıaltaný termoıadrolyq reaktorynyń modeli, energetıka men qorshaǵan ortany qorǵaý salasyndaǵy Memleket basshysynyń bastamalary kórsetilgen medıaqabyrǵa tanystyryldy.  

Sonymen qatar, Nursultan Nazarbaev kórme kesheniniń Kongres-ortalyǵynda bolyp, «Shańyraq», «Aspan» zaldaryn, VIP-terrasany, Konsert zalyn kórdi. Kongres-ortalyq kópfýnksıonaldy mádenı ári oıyn-saýyq ortalyǵy bolyp sanalady. Onda 2 192 orynǵa arnalǵan kórermender zaly jáne 4 konferens-zal bar. 

Qazaqstan Prezıdentine kórmeniń ashylý rásimi qalaı ótetini kórsetildi.  

Sholýshy: Gúlim Jaqan