Qazaqstannyń halyq ártisi Tuńǵyshbaı Jamanqulovqa keshe úkim oqyldy. Sot sheshimin estigennen keıin Tuńǵyshbaı Jamanqulov azattyq.org tilshisine QR Prezıdenti Nursultan Nazarbaevqa ókpeli ekenin aıtty. 

"Arnaıy úndeý jasaǵan prezıdentime úlken inisi retinde ókpelimin. Arasha túspegenine ókpelimin" dedi Tuńǵyshbaı Jamanqulov. 

Esterińizge sala keteıik,«Qarjy jymqyrdy» dep tutqyndalǵan Tuńǵyshbaı Jamanqulovtyń, qamaýǵa alynardan birneshe kún buryn vıdeo málimdeme arqyly Elbasynan arasha suraǵan.

Vıdeoda akter Mádenıet mınıstri Arystanbek Muhamedıulymen bas arazdyǵynyń bolǵanyn, fılmge bólingen qarajatty «Qazaq eli» serıalyna aýdaryp jibergenin, Talǵat Jánibekovtiń shalys basyp, mınıstrdi aıyptap aǵat qylyq jasaǵanyn, óziniń Eńlik Sydyqovany qorǵap, jýrnalıske vıdeo suhbat bergenin, Arystanbek Muhamedıulymen túsinisý úshin Astanada kezdeskenin, keshirim suraǵanyn moıyndaı otyryp, biraq mádenıet mınıstriniń mámileden bas tartqanyn, «bala-shaǵań qańǵyryp qalady» dep qoqan-loqqy kórsetkenin, qısynsyz aıyp taǵyp, talap qoıǵanyn aıtqan.
Aıta keteıik, Sot prokýror suraǵandaı jaza taǵaıyndady. №2 Medeý aýdandyq sotynda prokýror Tuńǵyshbaı Jamanqulovty 7 jyl 6 aıǵa sottaýdy, biraq Qazaqstan táýelsizdiginiń 25 jyldyǵyna oraı jarıalanǵan raqymshylyq boıynsha jaza merzimin 3 jyl 7 aıǵa azaıtýdy jáne jasy jetkenin eskerip shartty jaza kesýdi suraǵan edi.

Sholýshy: Ásem Álmuhanbet

,