Shanhaı yntymaqtastyq uıymynyń 14-otyrysynda hattamaǵa qol qoıyldy. Hattamaǵa sáıkes, SHYU aıasyndaǵy kópjaqty jáne ekijaqty mádenı baılanystardyń odan ári damýy kózdelgen, dep jazady Qamshy aqparattyq agenttigi. Sondaı-aq, Úndistannyń Qazaqstanmen birigip kıno túsirmek oılarynyń bary da anyqtaldy.

«Biz hattamaǵa qýana qol qoıdyq. Eń aldymen, biz tyǵyz qarym-qatynasqa múddelimiz. Men birinshi kezekte bizde beıresmı qarym-qatynastyń baryn aıta ketkim keledi. Bizdiń yntymaqtastyǵymyz óz jemisin berýde. EKSPO aıasynda terrakt jaýyngerleriniń ataqty kórmesi uıymdastyrylatyn bolady, al ol kórmeniń qarjysyn Qytaı Mádenıet mınıstrligi tolyǵymen óteıtin boldy. Sondaı-aq, Ózbekstan Mádenıet mınıstrligimen de tyǵyz qarym-qatynastamyz. Qyrǵyzstanmen de birigip qyzmet jasaýdy qolǵa almaqpyz. Bul ulttyq sport oıyndaryn damytý bolyp tabylady: kókpar, qyz qýý jáne taǵy basqalary», - dedi QR Mádenıet jáne sport mınıstri Arystanbek Muhamedıuly.

Úndistanmen kınoındýstrıa salasyn damytý maqsatynda yntymaqtastyq ornatý jóninde de sóz boldy.

«Biz Qazaqstanmen tereń qarym-qatynastamyz. Eki eldiń mádenı qundylyqtary uqsaıdy. SHYU arqyly yntymaqtastyǵymyz odan ári nyǵaıa túsedi degen úmittemin. Ár sózin bımen jetkizetin úndi fılmderiniń dárejesiniń joǵarylyǵy bárine málim. Endigi kezekte Qazaqstanmen kınoındýstrıa salasyn baılanystyrmaq nıettemiz», - dedi Úndistan Mádenıet mınıstriniń orynbasary Shıfalı Shah.

Sholýshy: Gúlim Jaqan