Qytaıdyń ońtústik teńizderinde jasandy araldar quryp mılıtarızasıalanýyn AQSH oń qabyldamaıdy dep jazady Qamshy aqparattyq agenttigi BBC orys qyzmetine silteme jasap. Bul týrly Pentagon basshysy Djeıms Mettıs málimdegen.

Sıngapýrda qaýipsizdik konferensıasynda sóılegen Mettıs Qytaıdyń óńirde áreketti bolýyn turaqtylyqqa qaýip tóndiredi dep ataǵan.

«Biz jasandy araldarda áskerılený men halyqaralyq sýlarda shekten tys áreket etetin elderge qarsy turamyz. Biz statýs-kvony májbúrli bir jaqtyly ózgertýge kónbeımiz ári kelispeımiz», - dep eskertken Mettıs.

Sondaı-aq AQSH Qorǵanys mınıstri Qytaıdyń Soltústik Koreıanyń raketalary men ıadrolyq belsendiligin tejeýdegi róli mańyzdy ekenin aıtqan.

Buǵan deıin AQSH memlekettik hatshysy Reks Tılerson «Qytaı araldardaǵy qurylysty toqtatýdyń qajettigin túsinýi tıis» degen.

Al, resmı Beıjiń Qytaıdyń óńirde óz múddesin saqtap qalatynyn málimdegen.

Máseleniń tarıhy:

Qytaı Ońtústik-Qytaı teńizinde tolyqtaı ámir etýge umytylyp keledi.

Al AQSH bolsa barlyq halyqaralyq sýlarda operasıa júrgize alamyz dep ókirekteıdi.

Beıjiń men Vashıngton buǵan deıin bir-birlerin Ońtútsik-Qytaı teńizinde áskerılený boıynsha kinálasqan.  Sońǵy jyldary Qytaı atalǵan óńirde jasandy araldar salyp, oǵan áskerı qurylystar júrgize bastaǵan.

Al, ótken jyldyń aıaǵynda amerıkalyq Strategıalyq jáne halyqaralyq zertteýler ortalyǵy mamandary spýtnıktik sýretterden Qytaıdyń jasandy araldarynda raketaǵa qarsy qorǵanys  júıesi qurylystaryn anyqtaǵan.