«Bizdiń elimiz ben Ózbekstan arasyndaǵy saýda kólemi jyl saıyn artýda, sonyń ishinde kórshilerimiz bizden mıllıardtaǵan dollardyń ónimderin satyp alady. Eki eldiń arasynda erkin saýda jasaý jóninde Memleket basshylary 1997 jyly qol qoıǵan kelisim bar. Onda eki jaq ta shekara arqyly ótetin eksport nemese ımport taýarlarǵa eshqandaı kedendik nemese basqa da alym-salyq salmaımyz dep kelisken. Alaıda...
Alaıda ózekeńder soǵan qaramaı Qazaqstannan engen taýarlarǵa birjaqty salyq salyp, olardyń baǵasyn kóterý arqyly ımportty shekteý saıasatyn júrgizip otyr», - dep Májilistiń sońǵy otyrysynda depýtat Nurlan Jazylbekov dabyl qaqty.
Óziniń sózinde depýtat ózbek jaǵy Qazaqstannan engen taýarlarǵa aksız salyǵyn salatynyn aıtty. Ádette bul salyq qoǵamdyq qaýpi bar alkogól men temeki ónimderine ǵana salynýshy edi, al ózbekter Qazaqstannan engen barlyq taýarlarǵa sony qosyp jáne onyń kólemin jyl saıyn arttyrýda. Sonyń ishinde kondıter jáne et ónimderine, jıhazdar men toqyma ónimderine 50 paıyz, televızorlarǵa 60, sút ónimderi men shyryndarǵa 70 paıyz kóleminde aksız salatynyn aıtty. Ol ol ma, alkogólsiz sýsyndarǵa 100, balmuzdaqtarǵa tipti 200 paıyz kóleminde aksız salyp, baǵasyn 2-3 esege arttyryp jiberedi eken. 2013 jyly ózbek aǵaıyndar taǵy da 45 túrli ónimderge aksız qosatynyn aıtypty. Munyń ózi qazaqstandyq taýarlardy engizbeýdiń bir jaqty amaly ekeni sózsiz. Bul is 1997 jyly qol qoıylǵan eki el arasyndaǵy Kelisimshartty tikeleı buzyp otyr, dedi N.Jazylbekov. Al bizdiń jaq ózbek taýarlaryna eshqandaı ústeme alym-salyq qospaı, esigimizdi shalqasynan ashyp tastadyq. Búgingi kúni Qazaqstanǵa ózbekter jınaıtyn avtomobılder men aýylsharýashylyǵy máshıneleri jáne basqa da taýarlar aǵylyp kelip jatyr. Saıyp kelgende mundaı «jomarttyq» ózbekterge jeńildik jasap, al ózimizdiń taýaróndirýshilerdiń múddesin qorǵaı almaı otyr, deı kelip depýtat N.Jazylbekov Premer-Mınıstr Kárim Másimovtyń atyna osy máselelerdi kórsetip saýal joldaıtynyn, onda ekijaqty teń jaǵdaıdy jasaý úshin ózbek jaǵymen aksızderdi alyp tastaý jóninde kelisimge kelýdi bolmasa, biz de sondaı kólemde olardyń taýarlaryna salyq salýymyz qajet ekenin usynatynyn aıtty. Bul depýtattyq saýalǵa Parlamenttegi «Aq jol» partıasy fraksıasynyń barlyq músheleri qol qoıdy.
Arman ÁDİLET
