«Biryńǵaı zeınetaqy qoryndaǵy» qarjy kisi qolynda ketýde. Turǵyndardyń "kárilik kelgende kádeme jarar" dep jınap júrgen aqshasy komersıalyq bankterdi qarjylandyrýda. Tipti qordaǵy aqshanyń qyzyǵyn Reseı banki kórýde. «KTK arnasynyń» habarlaýynsha, bul máseleni depýtat Azat Perýashev kótergen.
«Qatardaǵy turǵyndardyń jınaǵan aqshasyn bizdiń Ulttyq bankimiz de, «Biryńǵaı jınaqtalǵan zeınetaqy qory» da Reseıdiń «Sberbankine» jiberip jatyr. Ózimiz bilip otyrmyz ǵoı, Reseıde jaǵdaı qandaı ekenin qazirgi kezde. Rúbl túsip bara jatyr. Eger, óz qarjy júıesin qutqarýǵa, bizdiń aqshamyzdy jiberse, erteń zeınetkerlerimiz aqshasyz qalady. Mysaly, bıyl otandyq qordan "Sberbankke" 152 mıllıard teńge bólinipti. Iaǵnı, qarapaıym jurttyń aqshasy Reseıdi qarjylyq qıyndyqtan qutqarýǵa jumsalýda», - dep málimdegen depýtat Perýashev.
Depýtat óz sózinde, "Biryńǵaı zeınetaqy qoryndaǵy" qarjynyń qalǵan bóligi jalpaq jurtqa bir tıyndyq paıdasy joq ekinshi deńgeıli bankterge quıylyp jatqanyn aıtqan. Árkimniń aı saıynǵy jalaqysynyń 10 paıyzy komersıalyq bankterdiń depozıti men qundy qaǵazdaryna salynatyny belgili. Al, qazirgideı ekonomıkalyq turaqsyzdyq kezde bul kapıtaldyń qaıtarymsyz, túbegeıli qurdymǵa ketýi de múmkin. Qarapaıym turǵyndardyń esebinen jeke bankterge zeınetaqy qorynan aqsha bólýdi doǵarý kerek degen depýtat sózin qup kórýge ábden bolady.
Byltyrǵy jyly, Marchenkonyń kezinde Qazaqstandaǵy zeınetaqy qory ortalyqtandyrylǵan bolatyn. Sonymen qatar zeınetaqy taǵaıyndaý júıesine de aıtarlyqtaı ózgerister endi. Onsyz da kún sanap quny túsken teńgeden jyrmyshtap, qorǵa jınaqtaıtyn aqshany qaıtarymy bolmaı qalý qaýpi bar salaǵa jumsaýǵa nendeı qısyn bar?
Sberbank – Reseılik banktiń Qazaqstandaǵy bólimshesi. Onyń elimizdiń ekinshi deńgeıli bankterden aıyrmashylyǵy tabysy Reseıge ketetindigi. Buny kez kelgen adam biledi. Depýtat keltirgen derekke saı, otandyq qordan "Sberbankke" 152 mıllıard teńge bólinýi – aqshany tekke shashýmen birdeı-aq áńgime. Bunyń astarynan qazaqtyń teńgesin rúblge táýeldi ete túsýden basqa saıasat kóre almaımyz.
Úkimet ádette kóptegen jobalardy qolǵa alyp, sybyrǵa aıǵaı qosyp zaýyttar ashyp jatady. Sonyń bárine shetelden ınvestısıa tarttyq dep shalqaqtaıdy. Sondaı zaýyttardyń, óndiris oshaqtarynyń básekege qabiletti, sapaly taýar shyǵara qoımaıtyny óz aldyna, kóp ótpeı jabylyp qalyp ta jatady. Zeınetaqy qory – az aqshanyń qazany emes. Bundaǵy aqshany alyp-satarlyq deńgeıden arys asa almaıtyn bankterge jumsaǵansha, otandyq óndiriske, jeke kásipkerlikti damytýǵa, aqsha óte az bólinetin ǵylym salasyna qaraı baǵyttaý kerek. Úkimet osy turǵydan jedel sharalar qoldanýy kerek. Jiliktiń maıly basyn Reseıge ustata berýdi qoıatyn kez jetti.
Nurǵalı Nurtaı
