Qyrǵyzstan astanasy Bishkekte Shanhaı yntymaqtastyq uıymy elderi úkimet basshylarynyń kezdesýi ótti, dep habarlaıdy Qamshy aqparattyq agenttigi 24.kz-ke silteme jasap. Basqosýda birqatar qujatqa qol qoıylyp, aldaǵy jyldardaǵy uıymnyń damýyna qatysty is-sharalar aıqyndaldy. Al sarapshylar: «Qyrǵyzstan tóraǵalyq etken bir jyl ishinde mol tájirıbe jınap, múshe eldermen tıimdi qarym-qatynasyn nyǵaıtýǵa múmkindik aldy», – deıdi.
Bishkekte ótken Shanhaı yntymaqtastyq uıymy úkimet basshylarynyń kezdesýinde saýda-ekonomıkalyq jáne ınvestısıalyq qatynasty damytýǵa baǵyttalǵan 12 qujatqa qol qoıyldy. Olardyń birqatary jańadan qabyldandy. Onyń ishinde aldaǵy 5 jylda júzege asyrylatyn is-sharalar tizimi bar. Bul qujatty uıym aýmaǵyndaǵy ekonomıkalyq damýǵa arnalǵan jol kartasy dese de bolady. Al joldardy damytý jónindegi kelisimshart kóliktik ınfraqurylymdy damytý men kólik jáne logıstıka salasyndaǵy ózara tıimdi jobalardy júzege asyrýdy kózdeıdi.
Edıl Osmonbetov, saıasattanýshy: - Qyrǵyzstannyń SHYU-daǵy tóraǵalyǵy – bizge mol tájirıbe. Delegattardyń kezdesýi men basqa da sharalardan biz kóp tájirıbe jınadyq. Ekinshiden, bizde teńizge shyǵatyn jol joq. Sondyqtan eger uıymnyń maqsaty men barlyq júıesi jumys istep jatsa, álemdik naryqqa shyǵýǵa qol jetkizemiz. Bul Qyrǵyzstan úshin tıimdi. Shanhaı yntymaqtastyq uıymy geosaıası jaǵdaılarǵa baıyppen qarap, ózgeristerdi utymdy paıdalaný arqyly únemi damyp keledi. Qazir bedeldi birlestikke aımaqtyq qana emes, álemdik turǵydan alǵanda yqpaly kúshti elder kóńil aýdaryp otyrǵanyn aıtýǵa bolady. Kezinde 5 eldi biriktirgen uıym 8 memleketti qamtıtyn birlestikke aınaldy. Sonymen qatar Iran – baqylaýshy, al Túrkıa jáne Ázerbaıjan elderi dıalog boıynsha áriptes mártebesine ıe. Sondyqtan olarmen qarym-qatynas tyǵyz yntymaqtastyqty qajet etedi.
Medet Tólegenov, saıasattanýshy: - Bul uıymǵa múshe bolýǵa ıadrolyq basymdyqqa ıe elder de qyzyǵyp otyrǵan bolar. Bul – tóraǵalyq etýshi elge úlken múmkindik. Munda iri oıynshylar bolǵanymen, biz báribir óz tarapymyzdan tepe-teńdikti saqtaý men qurylymdaýda úlesimizdi qosyp otyrmyz. Shanhaı yntymaqtastyq uıymyna Qyrǵyzstan birneshe ret tóraǵalyq etti. Eger uıymnyń qarqyndy damýyn eskersek, onyń ár jańa múshesi tóraǵalyq etýshi memleketke júkteletin mindetterdi de arttyra túseri sózsiz.
Sholýshy: Aıgerim TAÝBAI
