Qurban aıt halqymyzdy biriktiretin meıram bolýy kerek. Búgin Elbasy Nursultan Nazarbaev Astanadaǵy «Áziret Cultan» meshitinde barsha musylman qaýymyn Qurban aıt merekesimen quttyqtaýynda osylaı dedi.«Musylmandar tilimen de, isimen de eshkimge jamandyq jasamaıdy» degen sóz bar. Sondyqtan da, búgingi qurban shalý tek qan aǵyzý ǵana emes, óziniń shyn júregimen súıetin Allanyń, Qurannyń sózine jyǵylýdy, sendirýdi bildiredi. Sonymen qatar, bul mereke bir‑birimen kelispegen aǵaıyndardy tabystyryp, kedeılerge, jetim‑jesirge kómektesip, qurbandyqqa shalǵan maldyń etin solarǵa taratyp, jaqsylyq jasaýǵa úndeıdi. Jurttyń shapaǵat kórsetip, baılar men kedeıdiń, eldiń arasyn bir‑birine jaqyndatatyn ulyq meıram. Dál osyndaı qaǵıdamen merekeni toılaıtyn bolsaq, ol úlken ǵanıbet», ‑ dedi Memleket basshysy. Sonymen qatar, Prezıdent  táýelsizdiktiń arqasynda Qurban aıt kúni mereke sanalǵanyn da aıtty. «Bul  meıram jumys istemeıtin, elder shúıirkelesip, bir-birin quttyqtaıtyn kún, aǵaıyn-týǵandy tóńiregine jınap, halqymyzdy biriktiretin kún. Biz eńseli el bolamyz degen halyqpyz. Táýelsizdigimizdi nyǵaıtyp, Qazaqstannyń tuǵyryn berik etip jatqan halyqpyz. Sondyqtan bizdiń halyqqa uly birlik, birlesken tirlik kerek. Otanymyzdy súıý kerek. Urpaǵymyzdy otansúıgishtikke úıretý kerek. Barlyǵymyzdyń mindetimiz sol. Sondyqtan barshalaryńyzdy osy merekemen quttyqtaımyn. Aıttan aıtqa aman jetip, Allanyń aldyndaǵy tilek‑nıetterimiz qabyl bolsyn. Eki dúnıede Alla betimizdi jarqyn qylsyn. Jurtymyz úshin jasap jatqan barlyq tilegimiz oryndalsa eken», ‑ dep aıaqtady sózin Elbasy N. Nazarbaev.

Avtor: Qanat Mámetqazyuly

"QazAqparat"