Memleket basshysy Belarýs Respýblıkasynyń Prezıdentimen kezdesý barysynda oǵan Shanhaı yntymaqtastyq uıymynyń samıtine jáne «Astana EKSPO-2017» dúnıe júzilik kórmesiniń ashylýyna qatysý úshin Qazaqstanǵa kelgenine alǵys aıtty. Bul týraly Qamshy aqparattyq agenttigi Aqordaǵa silteme jasap habarlaıdy.

– Eki jarym jyl ishinde tıisti ınfraqurylymy bar tutas bir aýdan salyndy. Kórmege qatysýshylar úshin turǵyn úıler, qonaq úı kesheni, kongres-hol jáne osy aýqymdy is-sharany ótkizýge qajetti basqa da ǵımarattar boı kóterdi. Kórmeni ótkizgen soń bul jerde Astana halyqaralyq qarjy ortalyǵy jumys isteıtin bolady, – dedi Nursultan Nazarbaev.  

Qazaqstan Prezıdenti halyqaralyq kórmeniń negizgi ıdeıasyna toqtalyp, kórmeniń basty nysany – «Nur Álem» pavılonyndaǵy ekspozısıalar týraly aıtty.     

Belarýs Respýblıkasynyń Prezıdenti Nursultan Nazarbaevqa halyqaralyq kórmeniń ashylýyna qatysýǵa shaqyrǵany úshin rızashylyq bildirdi.  

– Biz pavılondardy aralap kórip qana qoımaı, sizderdiń ekspozısıalyq keshender qurylysyndaǵy tájirıbelerińizdi muqıat zerttemekpiz. Óıtkeni biz de halyq sharýashylyǵy jetistikteri kórmesin uıymdastyrýdy josparlap otyrmyz, – dedi A.Lýkashenko.

Sonymen qatar, Belarýs Prezıdenti Nursultan Nazarbaevtyń tarıhty zertteýde ádilettilikti qalpyna keltirýge jete kóńil bóletinin atap ótti.

– Siz burynǵy lagerdiń ornynda «ALJIR» mýzeıin ashýǵa kóp kúsh jumsadyńyz. Bul lagerde burynǵy Odaqtyń túkpir-túkpirinen aıdalyp kelgen adamdar qamaldy. Onyń ishinde Belarýsıadan kelgen áıelder de boldy. Búgin biz birqatar hattar men taǵdyry lagermen baılanysty adamdardyń is qaǵazdaryn ala keldik. Bul – mańyzdy qujattar, – dedi A.Lýkashenko.      

Kezdesý sońynda memleketter basshylary ekijaqty qatynastardy damytýdyń ózekti máselelerin de talqylady.

Sholýshy: Aıgerim Taýbaı