Nursultan Nazarbaev Birikken Ulttar Uıymynyń Bas hatshysy Antonıý Gýterrıshpen kezdesti, dep habarlaıdy Qamshy aqparattyq agenttigi Aqordanyń baspasóz qyzmetine silteme jasap.
Memleket basshysy BUU Bas hatshysyna Shanhaı yntymaqtastyq uıymyna múshe memleketter basshylarynyń keńesine qatysqany úshin shynaıy rızashylyǵyn bildirdi.
«Shanhaı yntymaqtastyq uıymynyń tarıhynda BUU Bas hatshysy onyń jumysyna birinshi ret qatysýda. Sizdiń osy sharaǵa kelýińiz uıym úshin tarıhı sát - SHYU-ǵa Úndistan men Pákistannyń qabyldanýymen tuspa-tus kelip otyr. Sol arqyly bul uıym aımaqtyq deńgeımen shektelmeı, eleýli saıası kúshke aınalýda», - dedi Nursultan Nazarbaev.
Memleket basshysy BUU qyzmetiniń qaǵıdattary men onyń barlyq bastamalaryn Qazaqstan árdaıym qoldap kelgenin atap ótti.
«Ózińiz biletindeı, Qazaqstan antıadrolyq qozǵalystyń kóshbasshysy sanalady jáne BUU tarapynan 29 tamyz - Iadrolyq synaqtarǵa qarsy halyqaralyq is-qımyl kúni bolyp jarıalandy. Men Qazaqstan tarapynan Iadrolyq qarýsyz álem jáne jahandyq qaýipsizdik úshin beriletin syılyq taǵaıyndadym. Iordanıa Koroli İİ Abdalla osy halyqaralyq syılyqtyń birinshi laýreaty atandy», - dedi Qazaqstan Prezıdenti.
BUU Bas hatshysy Nursultan Nazarbaevty Shanhaı yntymaqtastyq uıymynyń samıtin ótkizýimen quttyqtap, oǵan Úndistan men Pákistannyń múshe bolyp qabyldanýyn atap ótti.
«Men osy samıtke Shanhaı yntymaqtastyq uıymynyń birte-birte búkil álemdegi yqpaldastyq ortalyǵyna aınala bastaǵanyn jete sezinip keldim. Bul uıym, meniń oıymsha, búgingi álemdik qurylymnyń mańyzdy tiregi bolyp sanalady. Úndistan men Pákistan osy basqosýda syndarly dıalog júrgizý úshin jańa múmkindikterge ıe bolady dep oılaımyn», - dedi A.Gýterrısh.
