Elbasy Ulttyq qaýipsizdik komıtetiniń tóraǵasy Kárim Másimov pen İshki ister mınıstri Qalmuhanbet Qasymovty qabyldady, dep habarlaıdy Qamshy aqparattyq agenttigi Aqordanyń baspasóz qyzmetine silteme jasap.
Kezdesý barysynda Memleket basshysyna 2017 jylǵy bes aıdyń qorytyndysy boıynsha eldegi qylmystyq ahýaldyń jaǵdaıy týraly esep berildi.
Nursultan Nazarbaev quqyq qorǵaý organdary júrgizip otyrǵan sharalardyń nátıjelerine toqtalyp, azamattardyń qaýipsizdigin qamtamasyz etý jónindegi jumystyń sapasyn jaqsarta berý qajettiligin atap ótti.
– Jalpy, jaǵdaı jaqsaryp keledi. Qylmys jasaý 16 paıyzǵa azaıdy. Olardy ashý kórsetkishi 60-tan 70,2 paıyzǵa kóterildi. 26 myń adamǵa raqymshylyq jasalyp, 1200 adam bas bostandyǵynan aıyrý oryndarynan bosatyldy, – dedi Qazaqstan Prezıdenti.
İshki ister mınıstri Halyqaralyq «EKSPO-2017» mamandandyrylǵan kórmesin ótkizý kezinde Astanadaǵy quqyqtyq tártipti qamtamasyz etý barysynda qabyldanyp jatqan sharalar týraly baıandap, ishki ister organdaryndaǵy reformalardyń nátıjeleri jóninde aıtty.
Elbasy Halyqaralyq «EKSPO-2017» mamandandyrylǵan kórmesiniń ashylýynda tıisti qaýipsizdikti qamtamasyz etkeni úshin quqyq qorǵaý organdarynyń barlyq qyzmetkerlerine rızashylyq bildirdi.
– Kóptegen memleketter basshylary men qonaqtar qatysqan «EKSPO-2017» kórmesiniń ashylýynda qaýipsizdikti qamtamasyz etken elimizdiń búkil polısıa qyzmetine, Ulttyq qaýipsizdik komıtetine, «Syrbar» syrtqy barlaý qyzmetine jáne basqa da organdarǵa alǵys aıtamyn. Biz kórmeniń ashylýyn uıymshyldyqpen ótkizdik, – dedi Memleket basshysy.
Nursultan Nazarbaev mundaı is-sharalardy ótkizý kezinde qaýipsizdikti qamtamasyz etýdiń aıryqsha kúrdeli másele ekenine toqtalyp, barlyq quqyq qorǵaý organdarynyń jumysyn joǵary baǵalady.
– Astanaǵa oblystardan adamdar jiberildi. Ofıserlerdiń barlyǵy belgilengen oryndarynan tabyla bildi. Árqaısysy ózine tapsyrylǵan ispen aınalysty. Barlyq salada da kásibıliktiń joǵary deńgeıi qamtamasyz etildi, – dedi Qazaqstan Prezıdenti.
Kezdesý sońynda Elbasy birqatar naqty tapsyrma berdi.
