Almatydaǵy №7 qalalyq klınıkalyq aýrýhanasynda halyq densaýlyǵyn jaqsartyp, medısınalyq kómektiń qoljetimdiligin arttyrý maqsatynda qandaı jumys júrgizilip jatyr? Sońǵy ýaqytta qandaı jańa medısınalyq ádis-tásilder engizildi? Mindetti áleýmettik medısınalyq saqtandyrý boıynsha aýrýhana qyzmetinde qandaı ózgeris bar? Osyndaı otandyq medısınanyń ózekti de mańyzdy saýaldaryna jaýap berý úshin №7 qalalyq klınıkalyq aýrýhanasynda Medısına qyzmetkerleri kúnine oraı jýrnalıserge arnalǵan pres-týr ótti. Bul shara respýblıkalyq «Kásibińe basymdy ıem» aksıasy aıasynda uıymdastyryldy.
Qazaqstandyq medısına salasynda jańalyq kóp. 2018 jyldyń 1 qańtarynan bastap mindetti áleýmettik medısınalyq saqtandyrý júıesi qoldanysqa engiziletini belgili. Bul reformaǵa sáıkes, emhanalar men aýrýhanalar arasyndaǵy básekelestik artyp, dárigerlerdiń jaýapkershiligi joǵarylaı túspek. Osyǵan baılanysty aýrýhana ujymy BAQ qyzmetkerlerin otandyq medısına salasyndaǵy sońǵy ınovasıalyq jańalyqtardan habardar etip, aýrýhanadaǵy zamanaýı qural-jabdyqtardy kórsetti.
«Bizdiń aýrýhana qyzmetkerleri kún-tún demeı halyqqa joǵary sapaly qyzmet kórsetýdi maqsat etedi. Aýrýhana sońǵy úlgidegi zamanaýı qural-jabdyqtarmen tolyq jabdyqtalǵan. Sonymen qatar, dárigerler biliktiligin arttyrý mindetin de esten shyǵarmaımyz. Sapaly medısınalyq kómek arqyly ǵana halyqtyń alǵysyna bólenip, kóńilinen shyǵýǵa bolady», - dedi №7 qalalyq klınıkalyq aýrýhana Bas dárigeri Marat Shadybaıuly.
Jýrnalıser úshin uıymdastyrylǵan pres-týr barysynda kardıologıa men gematologıa bólimderiniń ıntensıvti emdeý palatalary ashyldy.
«Bul qarqyndy emdeý palatalarynda operasıadan shyqqan naýqastar emdeledi. Palatalarda arnaıy kóp fýnksıonaldy kereýetter bar. Kardıomonıtor, ottegi, defıbrıllátormen jabdyqtalǵan. Naýqastar jeke medbıkeniń qaraýynda bolady. Jalpy №7 qalalyq klınıkalyq aýrýhananyń gematologıa bólimi qan aýrýlaryna shaldyqqan naýqastarǵa jan-jaqty kómek kórsetip keledi», - dedi №7 qalalyq klınıkalyq aýrýhana Bas dárigeriniń emdeý isi boıynsha orynbasary Jadyra Silámqyzy.
Budan bólek, ortalyqtandyrylǵan jáne arnaıy oqý zaly bar arhıv júıesi men Call-ortalyqtyń tusaýkeseri ótti. Call-ortalyq halyq tarapynan túsken kez-kelgen suraqqa jaýap berip, azamattarǵa der kezinde keńes berip otyrmaq.
«Call-ortalyqtyń negizgi mindeti – halyqqa bizdiń aýrýhanadaǵy medısınalyq qyzmet jaıly tolyqqandy aqparat berý. Oǵan qosa, ortalyqqa habarlasqan adamdar ózderine qajet keńes te ala alady», - dedi №7 qalalyq klınıkalyq aýrýhana Bas dárigeriniń ádistemelik-uıymdastyrý isi boıynsha orynbasary Nurlan Tańjaryquly.
Aıta ketý kerek, ortalyq sterılızasıalaý bóliminde de eýrostandartqa sáıkes jańa qurylǵylar ornatylǵan. Jýrnalıser osy avtomatty túrde jumys isteıtin apparattar jumysyn kórip, sırek jasalatyn operasıalar barysyn baqylap, naýqastardan suhbat aldy. Odan bólek, bul kúni BAQ qyzmetkerleri Danıadan kelgen bilikti neırohırýrg mamannyń Qazaqstanda tuńǵysh ret ortalyq júıke júıesi aýrýlaryna múldem jańa ádis – krıoanalgezıanyń ınovasıalyq ádisteri arqyly operasıa jasaý boıynsha sheberlik synybyna qatysty.
Zamanaýı apparattarmen qamtamasyz etýden bólek, tehnologıalyq jańalyqtardy bes saýsaǵyndaı ıgergen mamandar sanyn kóbeıtý de qolǵa alyndy. Osylaısha halyq densaýlyǵyn jaqsartyp, nyǵaıtýǵa úles qosýǵa bolady. Sondyqtan №7 qalalyq klınıkalyq aýrýhanasynda halyqqa aldyn ala dıagnostıka jasaý jáne emdeý túrleri usynylady.
