Besinshi synyp oqýshysy Ostın Kıng Hart otbasyn asyraý úshin baqshada jumys isteı bastady. Endi ol búkil otbasyn azyq-túlik, kókónispen qamtamasyz etkisi keledi.

Bul jas bala YouTube pen Facebook-te óziniń alǵyrlyǵymen tanylǵan.

«Men anamnyń jumys bólmesinen birneshe burshaqtyń dánin aldym. Bizdiń úıde ol kóp edi. Barlyq otbasyn tamaqtandyrý úshin azyq-túlik úıde jetispeıtin» deıdi Ostın Kıng Hart.

Dál osy kún Ostın úshin sheshýshi ýaqyt boldy. Ol bir sátte eresekterdiń ómirine qadam basty. Besinshi synyp oqýshysy otbasy ashyqpaýy úshin ne isteý kerektigin túsindi. Ol úıiniń aýlasyna dánderdi otyrǵyza bastady.

«Meniń egin sharýashylyǵy jóninde bar bilgenim ósimdiktiń ósýi úshin sý, kún jáne topyraq qajet ekeni» dedi mektep oqýshysy.

Bir aptadan keıin túıe burshaqtyń japyraqtary paıda bola bastady. Odan keıin burshaqtyń ózi de shyqty. Egin molynan shyqty. Ostın burshaqty satyp, otbasyn asyrady. Qysta Ostınniń otbasy sol nápaqamen kúneltip shyqty.

Úsh jyldan keıin Ostınniń óz úlken baqshasy boldy. Onda tek burshaq qana emes túrli kókónister bar. Ol jerdiń qunarly bolýyn jáne egin egýdiń túrli qyr-syryn meńgerip, ózbetinshe kóp izdendi.

Jetkinshek bolashaqta kim bolatynyn qazirdiń ózinde aıqyndap aldy. Ol egin sharýashylyǵymen aınalysyp, kásipker atanǵysy keledi. Bolashaqta óziniń tabıǵı taza, qunarly kókónisterimen barlyq aýyl-aımaqty tamaqtandyrǵysy keletinin aıtady. Sonymen qatar, Ostın eginniń únemi mol shyǵýy úshin ne isteý kerektigin zerttep júr. Sony tájirıbe júzinde kórmekshi. Eger boljamy rastalsa, ıdeıasyn memleketke usynbaqshy eken.

Qazir 13 jastaǵy bala óziniń ósirgen kókónisterin satyp qana qoımaı, jaǵdaıy tómen otbasylarǵa azyq-túlikti tegin taratady eken.

Sholýshy: Ásem Álmuhanbet