20 maýsym men 1 shilde aralyǵynda elimizde UBT ótkiziledi, - dep habarlaıdy tengrinews.kz. Bıylǵy testileý alǵash ret jańa formatta ótedi. Mektep túlekteri testterdi 165 UBT ótkizý pýnktinde tapsyrady. UBT 5 pán boıynsha tapsyrylady: Qazaqstan tarıhy, matematıkalyq saýattylyq, oqý saýattylyǵy (20 tapsyrmadan, shekti deńgeıi - ár pánnen keminde 5 baldan) jáne tańdalǵan mamandyqqa sáıkes 2 beıindi pánnen (30 tapsyrmadan, shekti deńgeıi 15 baldan kem bolmaýy tıis). 120 testtik tapsyrma boıynsha túlek maksımaldy 140 bal alýy múmkin.
Tapsyrmalardy oryndaýǵa 3 saǵat 50 mınýt ýaqyt bólinedi. Ulttyq testileý ortalyǵynyń málimetinshe, bıyl UBT-ǵa qatysýǵa 92 827 túlek nıet bildirip, aryz jazǵan. Olar bıylǵy mektep bitirýshilerdiń jalpy sanynyń (131 377) 71 paıyzyn qurap otyr. UBT tapsyrýǵa nıetti 69 209 túlek qazaq tilinde, al 23 618 - orys tilinde tapsyrady. UBT 165 tapsyrý pýnktiniń 1431 aýdıtorıasynda ótkiziledi. Bul aýdıtorıalar baılanys sıgnaldaryn bógeıtin qurylǵylarmen, metal detektorlarymen, UBT barysyn baqylaý jáne jazý beınekameralarymen, sondaı-aq Internet arqyly onlaın taratý kameralarymen jabdyqtalǵan. Ata-analarǵa yńǵaıly jaǵdaı qamtamasyz etý maqsatynda 108 pýnkttegi UBT barysy monıtorǵa shyǵarylyp, kórsetiledi.
Ádettegideı, UBT ótkizý oryndarynda medısınalyq qyzmet pen quqyq qorǵaý organdarynyń ókilderi jumys istep, aýyz sý jáne taǵam ónimderin satý oryndary qyzmet kórsetedi. UBT belgilengen tártip boıynsha ótkizilýi men erejelerdiń oryndalýyn qadaǵalaý úshin testileý ótkiziletin pýnktterge QR BǴM tarapynan JOO (75 paıyz) jáne kolejderdiń (25 paıyz) oqytýshylary jiberildi. Uıymdastyrý máselelerin sheshý úshin el óńirlerinde jergilikti JOO-nyń, bilim bólimderiniń, ákimshilikterdiń, quqyq qorǵaý organdarynyń, qoǵamdyq uıymdar men BAQ ókilderinen quralǵan memlekettik komısıalardy qurý qolǵa alyndy.
QR BǴM buıryǵymen testtik tapsyrmalar men tehnıkalyq aqaýlyqtar jónindegi apelásıalyq aryzdardy qarastyratyn Respýblıkalyq apelásıalyq komısıamen qatar, jer-jerde apelásıalyq komısıalar kuryldy. Tártip buryńǵydaı: apelásıalyq aryzdar UBT nátıjeleri jarıalannan keıingi kúnniń saǵ 13.00-ne deıin qabyldanyp, bir kúntizbelik kún ishinde qarastyrylady. QR BǴM testileýge sapaly daıyndyq júrgizý úshin qajetti jaǵdaılar jasap otyr. Úırenshikti túrde, ıaǵnı qaǵaz betterinde qabyldanyp kelgen synaqtyq testileýmen qatar, bıylǵy jyldyń basynan onlaın-testileýden ótý múmkindigi ashyldy. Al maýsym aıynan bastap bul qyzmet úshin aqy tóleý ınternet-bankıng arqyly júrgizý múmkindigi (kez kelgen bank kartasy arqyly, komısıasyz). Aıta keteıik, emtıhan materıaldary qupıalyqty qamtamasyz etý nusqaýlyǵynyń qatań talaptarymen, 99 myń dana taralymmen basylyp, býylǵan.
Sholýshy: Nazerke MUSA
