Qurmanǵazy men Pýshkındi súıistirip qoıǵan atyshýly posterdiń avtorlaryna qatysty sot úkimi shyqty. Qoǵam narazylyǵyn týdyrǵan sýretti salǵandar Qurmanǵazy atyndaǵy konservatorıaǵa 34 mıllıon teńge tóleýge mindetteldi. Bul týraly Tengrinews.kz saıty habarlap otyr. Sonymen qatar, post avtorlary respýblıkalyq BAQ arqyly keshirim suraýǵa mindetti.
"Stýdıa 69" geı-klýbyn jarnamalaǵan poster 24 tamyz kúni áleýmettik jelilerge shyqqan edi. Eki tulǵanyń súıisip turǵan sýreti el arasynda úlken narazylyq týdyrǵan bolatyn. Dereý kóterilgen halyq jarnama agenttigin sotqa berip, agenttik dırektory Darıa Hamıtjanovaǵa aıyppul salynǵan.
Aqparattarǵa saı, Havas Kazakhstan jarnama agenttiginiń bas dırektory Darıa Hamıtjanova sot sheshimimen kelispeı otyr eken. "Men dál mundaı sheshimdi kútpep edim. Menińshe, bul baryp turǵan ádiletsizdik, óıtkeni 34 mln teńge kompanıamyzdy qurdymǵa jiberedi, onyń ústine sot múlikti satýǵa tyıym saldy. Osydan keıin biz qalaı jumys isteımiz? Bul adamdar ol aqshany ózderi tapqan joq, mundaı somany alýǵa esh eńbek te sińirgen joq, tipti sot zalyna da aıaq baspady. Endi kelip 34 adamnyń árbirine tóleý kerek, qoǵam aldynda keshirim suraý degen taǵy bar. Men tipti de bilmeımin...", - degen arsyz jarnamany jasaýshy agenttik dırektory Darıa Hamıtjanova.
Elimizde gomoseksýalızmdi nasıhattaýǵa áli resmı túrde tyıym salynǵan joq. Alaıda, bul másele qoǵam tarapynan belsendi kóterildi. Osy zańnyń jumsaqtyǵynan tipti birjynysty qatynasqa barýshylar quqyǵyn qorǵaıtyn uıym qurmaqshy bolǵandar da boldy. Bul týraly myna siltemede jazǵan edik. Kóshelerimizden ultty qorlap, tarıhı tulǵalarymyzdy mazaq etetin jarnamalardy taǵy kórip qalmasy úshin Parlament tez arada atalǵan zańdy qabyldaýy tıis. Al, batystyń mádenıetin qabyldap, boıyna tolyqtaı ulttyq rýh sińbegen jastar erteń taǵy da sóleket isterge urynbas úshin Havas Kazakhstan jarnama agenttigine shyǵarylǵan sot sheshimi qalaıda oryndalýy kerek. Sebebi bul qoǵamda azǵyndyqqa shaqyrýshy keıbir múddeli kúshterdiń erteńgi qadamdaryn oılanyp basýyna sep bolady.
