Endi Qazaqstan aýmaǵynda taýardyń qunyn ulttyq valútamen kórsetpegen jarnamaǵa ákimshilik aıyp taǵylatyn bolady. Bul týraly Qamshy aqparattyq agenttigi Habar arnasynyń málimetine súıenip habarlaıdy.

Búgin bul jaıly Ulttyq ekonomıka mınıstri Tımýr Súleımenov málimdedi. Jarnama máseleleri boıynsha keı zańnamalyq aktilerge ózgerister men tolyqtyrýlar engizý týraly zań jobasyn depýtattar búgin birinshi oqylymda talqylady. Ol boıynsha endi jónsiz, ádepsiz jarnamalarǵa jol bergender jazalanady. Sondaı-aq ulttyq aza tutý kúni jarnama bergen tele- jáne radıo arnalar da ákimshilik jaýapkershilikke tartylady. «Bizde qoǵamǵa oı salatyn áleýmettik jarnamalar az», – deıdi mınıstr. Olardyń sanyn arttyrý mindeti tur, endi mundaı áleýmettik jarnamalar 15 tele- jáne radıo arnaǵa aqysyz ornalastyrylatyn bolady.

Sáken Qanybekov, QR Parlamenti Májilisiniń depýtaty: – Birinshiden, jarnamalyq konstrýksıalardy ornalastyrýdyń qoldanystaǵy praktıkasy qalaı ózgeredi? Ekinshi suraǵym – olardy ornatý qalaı reglamentteletin bolady? Tımýr Súleımenov, QR Ulttyq ekonomıka mınıstri: – Qazirgi qoldanystaǵy zańda bul eki uǵymnyń ara-jigi ashylmaǵan. Bar problema sodan týyndap otyr. Jarnama konstrýksıalaryn ornalastyrý jer, sáýlet, qurylys jónindegi zańnamada anyqtalsa, jarnamanyń mazmundyq jaǵy jarnama týraly zańmen retteledi. Endi syrtqy jarnamanyń mazmuny, ólshemi arnaıy tıptik erejege baǵynatyn bolady. Ony biz osy qujatta anyqtap kórsetemiz.

Sholýshy: Aıgerim Taýbaı