Qazaqstan Respýblıkasynyń Memlekettik hatshysy Gúlshara Ábdiqalyqova Qazaqstan men AQSH-tyń ózara is-qımylynyń 25 jyldyǵyna arnalǵan «Qazaqstan – AQSH» atty konferensıaǵa qatysty. Bul týraly Qamshy aqparattyq agenttigi Aqorda málimetine súıenip habarlaıdy.
Konferensıaǵa AQSH-tyń Qazaqstan Respýblıkasyndaǵy elshisi D.Krol, Prezıdent Ákimshiligi qurylymdyq bólimderiniń, memlekettik organdardyń basshylary, dıplomatıalyq qyzmet ardagerleri, halyqaralyq uıymdar men sheteldik dıplomatıalyq korpýstyń, qoǵamdyq uıymdardyń, ǵylymı-zertteý mekemeleri men oqý oryndarynyń ókilderi qatysty.
Memlekettik hatshy basqosýǵa qatysýshylarǵa arnaǵan sózinde Qazaqstan Prezıdentiniń syndarly syrtqy saıasaty memlekettigimizdiń nyǵaıýyna, ekonomıkalyq áleýetimizdi arttyrýǵa, elimiz úshin aldaǵy ondaǵan jyldarǵa mejelengen qaýipsizdiktiń júıeli qurylymy men kepildigin qalyptastyrýǵa qolaıly jaǵdaı jasaǵanyn aıtty.
Gúlshara Ábdiqalyqova ótken shırek ǵasyr ishinde bizdiń yntymaqtastyǵymyz ózara senimge, qoldaýǵa jáne ulttyq múddelerge qurmetpen qaraýǵa negizdelgen kemel strategıalyq seriktestik sıpatyndaǵy qarym-qatynas deńgeıine jetkenin atap ótti.
Memlekettik hatshy Qazaqstan men AQSH-tyń birlese otyryp, halyqaralyq beıbitshilik pen jahandyq qaýipsizdikti nyǵaıtý isine zor úles qosqanyna toqtaldy. «Bolashaqtyń energıasy» atty EKSPO-2017 kórmesi – jahandyq túıtkilderdi sheshý jolyndaǵy jarasymdy yntymaqtastyq rýhynyń jarqyn kórinisi. Oǵan jahandyq ornyqty damý úshin jańa tehnologıalardy damytýǵa birlese umtylǵan álemniń 115 eli qatysýda.
Konferensıa aıasynda halyqaralyq qaýipsizdik, beıbitshilikti saqtaý, saýda-ekonomıkalyq jáne mádenı-gýmanıtarlyq yntymaqtastyq salalaryndaǵy Qazaqstan men AQSH-tyń ózara is-qımylyna arnalǵan úsh paneldi otyrys bolyp ótti.
Sholýshy: Aıgerim Taýbaı
